Tótenshe jaǵdaılardyń aldyn alý sharalaryn uıymdastyryp júrgen «Ońtústik joldary» memlekettik kommýnaldyq kásipornynyń mamandary búginde Túrkistan jáne Arys qalalary men Sozaq, Túlkibas, Ordabasy aýdandarynda jaǵdaıdy qalpyna keltirip, kólikterdiń qaýipsiz yńǵaıly qozǵalysyn qamtamasyz etý jumystaryn júrgizýde. Jumystardy atqarýǵa mekemeniń 100-den astam jumysshylary jumyldyrylǵan, dep habarlaıdy OQO ákiminiń baspasóz qyzmeti.
Atap aıtsaq, «Ońtústik joldary» jumysshylary dál qazirgi tańda Sozaqtaǵy KH-57 «Sozaq-Qaraǵur-Baqyrly» avtomobıl jolyndaǵy sý qubyry buzylǵan 37+900 shaqyrymyn qaıta qalpyna keltirip, montajdaý jumystaryn júrgizgen bolsa, Túlkibastyń KH-69 «Tastumsyq-Jylandy-Azattyq-Shuqyrbulaq» avtomobıl jolynyń 69+950–69-650 shaqyrymdaryndaǵy sý qubyrlarynda oryn alǵan tasqyn sýdy arnaıy tehnıkalarmen qalpyna keltirý sharýalaryn atqaryp júr. Túrkistanda da jaǵdaı osy ispettes. Onda qazirgi tańda KH-58 «Túrkistan-Baltakól-Nurtas aýyly-Shornaq-Qarnaq-Kentaý» 69+500 shaqyrym aralyqtaryn jáne KH-84 «Túrkistan-Baltakól» avtomobıl jolynyń 19-26 shaqyrym aralyqtarynda tasqyn sý júrýde. Nysandaǵy búgingi ahýaldy mamandar damby salý arqyly turaqty jaǵdaıda ustap otyr.
Oblystyq jolaýshylar kóligi jáne avtomobıl joldary basqarmasynyń basshysy Nurlan Baıǵuttyń málimetinshe, jaýyn-shashyn basylyp, tasqyn sýdan keletin qater basylǵansha mekeme mamandarymen jaǵdaı turaqty baqylaýda bolady. Al jalpy, joǵaryda atalǵan aýdan, qalalardan ózge óńirimizdiń basqa da aımaqtaryndaǵy ahýal qanaǵattarlyq jaǵdaıda degen málimet bar.
