Foto: ashyq derekkóz
Jyl ishinde bank aktıvteri 15%-ǵa ósti. Ekonomıkaǵa berilgen nesıeler kólemi 19,1%-ǵa ulǵaıyp, 40,2 trln teńgeni qurady. Bankterdiń taza paıdasy 2,7 trln teńgege jetip, 2024 jylmen salystyrǵanda 6,7%-ǵa artty.
Bızneske nesıe – negizgi draıver
О́simniń basty qozǵaýshy kúshi korporatıvtik kredıt portfeli boldy. Bıznes sýbektilerine berilgen nesıeler bir jylda 18%-ǵa ósip, 2007 jyldan bergi eń joǵary qarqynǵa jetti. Al jańa bıznes-kredıtterdiń jalpy kólemi 20 trln teńgeden asty.
-
iri bızneske berilgen nesıeler 27,1%-ǵa ósip, 5,5 trln teńgege jetti;
-
jeke kásipkerler segmentinde ósim 35,6%-dy qurap, 3,1 trln teńge boldy.
О́sim barlyq salalarda baıqaldy. Ásirese aqparat jáne baılanys (+37,5%), qurylys (+23,1%) jáne saýda (+20,9%) salalarynda kredıtteý aıtarlyqtaı artty.
Barlyq satylym úshin keshbek: Qaı bankter jomarttyq tanytady?
Bul serpin qaryz qarajatynyń qymbattaýyna qaramastan qalyptasty. 2025 jyldyń jeltoqsanynda bızneske beriletin nesıelerdiń ortasha salmaqtalǵan mólsherlemesi 21,4%-ǵa jetip, bir jylda 1,7 paıyzdyq tarmaqqa ósti. Bul kompanııalardyń joǵary paıyzdyq mólsherlemelerge qaramastan, strategııalyq jobalardy iske asyrý nemese qaıta qarjylandyrý úshin nesıe alýǵa daıyn ekenin kórsetedi.
Halyqty kredıtteý baıaýlady
Bıznes segmentinen aıyrmashylyǵy, halyqty kredıtteý qarqyny retteýshiniń naryqty «salqyndatý» sharalarynyń nátıjesinde baıaýlady. Jeke tulǵalarǵa berilgen nesıeler portfeli 19,8%-ǵa ósti, al 2024 jyly bul kórsetkish 23,9% bolǵan.
Eń aıqyn nátıje kepilsiz tutynýshylyq nesıeler segmentinde baıqaldy:
-
portfel ósimi 2024 jylǵy 29,3%-dan 2025 jyly 14,5%-ǵa deıin tómendedi;
-
«jedel» nesıelerdiń jańa berilýi 22,6%-dan 6,1%-ǵa deıin qysqardy.
Sonymen birge avtonesıeleý naryǵy joǵary qarqynmen damýyn jalǵastyryp, bir jylda 42,4%-ǵa ósti jáne jalpy ósimge eleýli úles qosty.
Turaqtylyq joǵary, táýekelder saqtalýda
Bank sektorynyń qarjylyq turaqtylyǵy joǵary deńgeıde qaldy. Bankterdiń kapıtaly 19,2%-ǵa ósti, al kapıtaldyń jetkiliktilik koeffısıentteri (K1 – 19,6%, K2 – 20,8%) belgilengen normatıvterden edáýir joǵary.
Bankter týraly jańa zańǵa baılanysty depozıtterge kepildik berýde ne ózgeredi?
Alaıda nesıe portfeliniń sapasy birshama nasharlady. 90 kúnnen astam merzimi ótken qaryzdardyń (NPL 90+) úlesi 3,1%-dan 3,6%-ǵa deıin ósti. Halyqqa berilgen nesıeler portfelinde bul kórsetkish 4,3%-dy qurady. Provızııalarmen qamtý deńgeıi jetkilikti – 60,6%.
Qorytyndy
2025 jyldyń nátıjeleri bank sektorynda kredıtteýdiń qaıta bólingenin kórsetti. Retteýshi halyqqa beriletin táýekeli joǵary kepilsiz nesıelerdi aıtarlyqtaı tejeı aldy. Al bankter joǵary mólsherlemelerdi paıdalana otyryp, ásirese iri bızneske kredıt berýdi kúsheıtip, bul segmentte rekordtyq ósimge qol jetkizdi.
2026 jyly sektor úshin negizgi syn-qaterler joǵary paıyzdyq mólsherlemelerdiń saqtalýy men merzimi ótken qaryzdar úlesiniń ósýi bolmaq.
Endi jeńildetilgen ıpotekany jekemenshik bankter de usyna alady
