Aǵylshyn tiline qyzyǵýshylyǵyna anasy Nurgúl Myrzaǵalıdyń septigi tıse kerek. Kóbeıtý amaldaryn qazaq, orys, aǵylshyn tilderinde erkin oryndaıtyn balanyń daryny kópshilikti tánti etedi. Bes ul, bir qyz tárbıelep otyrǵan Nurgúl Myrzaǵalı kenjesi Álıdiń 2021 jyldyń qazan aıynda dúnıege kelgenin aıtady. Eki jasynan balabaqshaǵa barǵan Álı oıynshyq mashınalarǵa emes, kitap, dápter, qalamǵa qyzyǵýshylyq tanytqan. Onyń osy bir ereksheligin baıqaǵan anasy kóbine damytýshy oıynshyqtar alyp beretin. «Fıgýralar, sandar, áripterdi de tez úırendi. О́z betimen ınternetten qarap, alfavıtti úsh tilde meńgerip aldy. Bir kúni qarasam, úshinshi synyptaǵy balamnyń matematıka jınaǵyndaǵy tapsyrmalardy ózdiginen shyǵaryp qoıypty. Uıyqtar aldynda únemi «mama, esep aıtaıyqshy» dep suraıdy. Sol kúni jarty saǵattaı esep aıttyq. «Endi uıyqta» dep jatqyzǵanymda, birazdan keıin aǵylshyn tilinde kóbeıtý kestesin aıtyp jatqanyn estidim. Ol kezde jasy úshten endi asqan edi. О́zim aǵylshyn tili pániniń muǵalimimin. Kúni boıy jumystamyn, Álı balabaqshaǵa barady. Balabaqsha tárbıeshileri esepter berse, birden shyǵaryp tastap, qaıta-qaıta jańa tapsyrma suraıdy eken. Sóıtip, balabaqsha oǵan qyzyqsyz bola bastady. Úsh jastan asqanda tárbıeshileri balanyń erekshe qabiletti ekenin aıtyp, mektepke berýge keńes berdi. Byltyr qyrkúıekte, 4 jasynda mekteptiń daıarlyq synybyna berdim. О́zinen jasy úlken synyptastarymen tez til tabysyp, oqý baǵdarlamasyn birden meńgerip ketti. Tańerteń qınalmaı turady, sabaqtan qalǵysy kelmeıdi. Úıge kelgen soń da suraqtary taýsylmaıdy. Barynsha jaýap berýge tyrysamyn», deıdi anasy Nurgúl.
Búginde Álı «Altyntóbe» orta mektebiniń daıarlyq synybynda bilim alady. Orta mektep muǵalimi Álııa Mııatbekovanyń aıtýynsha, Álı tipti 5-6 synyp oqýshylary sheshe almaıtyn kúrdeli esepterdi olardan buryn shyǵaryp, kópshilikti qaıran qaldyryp júr. «Alǵash kelgende jasynyń kishiligine qarap, qalaı oqytamyz dep oıladyq. Biraq baıqasaq, bilim deńgeıi keı oqýshylarymnan da joǵary eken. Úsh tańbaly sandardy qosyp-azaıtady. Eki amaldy esep berip kórdik. Ony da ońaı shyǵardy. Oqı ala ma dep álippeni usynsaq, ony da erkin oqyp ketti», deıdi Álııa Mııatbekova. Al Baqdáýlet Jetibaı Álıdiń ápkesi Aıaýlymmen birge arnaıy kýrsqa qatysatynyn aıtady. «Sabaq barysynda oqýshylardan kóbeıtý kestesin suraǵanda, Álı de qasynda otyryp, jaýap berip qoıady. Keıde esepti úlkenderden buryn shyǵaryp úlgeredi», deıdi muǵalim.
Álippeni tolyq meńgergen Álı tek matematıkamen shektelmeı, aǵylshyn tilinde jetik oqyp-jazýǵa da yqylas tanytyp júr eken.
Túrkistan oblysy
