Joba Shymkent qalasy men Qaraǵandy, Qostanaı oblystarynda júzege asyryldy. Bastamanyń negizgi maqsaty – qoǵamda turaqty oqý mádenıetin qalyptastyrý jáne Qazaqstandy álemdegi eń kóp kitap oqıtyn on eldiń qataryna qosý. Osy baǵytta jańa format – kitap oqý marafony engizildi.
Jıynda sóz sóılegen Erlan Qoshanov bul bastama Memleket basshysynyń kitap oqý mádenıetin ilgeriletý jónindegi tapsyrmasy aıasynda qolǵa alynǵanyn atap ótti. Onyń aıtýynsha, kitap oqıtyn ult qalyptastyrý – eldiń zııatkerlik áleýetin arttyrýdyń basty tetigi.
«Qazir 23 sáýirdi – Ulttyq kitap kúnin el bolyp atap ótýdi ıgi dástúrge aınaldyrdyq. Sonymen qatar, búgin Prezıdent halqymyzdy Ulttyq kitap kúnimen quttyqtap, aldaǵy eki aptada oqýǵa qushtar, zııatker ult qalyptastyrý sharalary týraly Jarlyqqa qol qoıatynyn aıtty. Kitap oqıtyn ultqa aınalý – memlekettiń mádenı-rýhanı órkendeýiniń tóte joly. Kitap oqıtyn urpaq tárbıeleý – eldiń ıntellektýaldyq kapıtalyna salynǵan eń tıimdi ınvestısııa. «Kitap oqıtyn ult» pılottyq jobasy osy maqsatty kózdeıdi. Jobanyń basty mıssııasy – elimizdi álemdegi eń kóp oqıtyn on eldiń qataryna qosý», dedi partııa Tóraǵasy.
Sondaı-aq Erlan Qoshanov «AMANAT» partııasynyń ádebıet pen rýhanııat salasyn qoldaý baǵytyndaǵy júıeli jumysy men bastamalaryna toqtaldy. Atap aıtqanda, partııanyń Saılaýaldy baǵdarlamasy aıasynda 2023-2025 jyldary 150 mádenı nysan salyndy jáne 755 nysan kúrdeli jóndeýden ótti. Sonymen qatar partııa kitaphanashylardyń jalaqysyn kóterý jónindegi saılaýaldy ýádesin oryndady. Budan bólek, Májilistegi partııa fraksııasy depýtattarynyń bastamasymen jańa Salyq kodeksinde otandyq baspalar qosylǵan qun salyǵynan bosatyldy. Bul qadam oqyrmandar úshin kitaptyń qoljetimdiligin arttyrýǵa múmkindik beredi. Partııa jyl saıyn jas avtorlar arasynda «Uly dala» shyǵarmashylyq baıqaýyn ótkizip, úzdik jýrnalısterdi «AMANAT medıa syılyǵymen» marapattaıdy. Buǵan qosa, «Kitap-AMANAT» jobasy belsendi júzege asyrylyp keledi. Onyń aıasynda el aýmaǵyndaǵy partııa fılıaldary janynda 24 kitap ortalyǵy jumys istep tur. Osyndaı is-sharalar arqyly azamattar arasynda oqý mádenıeti qalyptasyp, kitapqa degen qurmet artyp keledi.
Sońǵy jyldary elimizde kitaphana isi de jandanyp keledi. Atap aıtqanda, kitaphanalar jańartylyp, jańa nysandar ashylyp jatyr. Sonyń nátıjesinde ótken jyly kitaphanaǵa kelýshiler sany 57 mln-ǵa jetip, 2024 jylmen salystyrǵanda 4,1% artqan. Sonymen qatar, onlaın kitap satylymy 50% ósken. Nazar aýdararlyǵy – oqyrmandardyń árbir úshinshisi bala.
«Ulttyq kitap» respýblıkalyq baıqaýynyń jeńimpazdary marapattaldy
Mádenıet salasyn qoldaý baǵytynda naqty sharalar qolǵa alynǵan. Sonyń ishinde jazýshylarǵa arnalǵan «Qazaqstannyń halyq jazýshysy» ataǵy qaıta berilip, avtorlyq qalamaqy máselesi sheshimin tapty. Sondaı-aq otandyq baspalar qosylǵan qun salyǵynan bosatylyp, kitaptyń qoljetimdiligi artty.
Joba 6 baǵyt boıynsha uıymdastyryldy – «Kitap oqıtyn áýlet», «Kitap oqıtyn memlekettik qyzmetshi», «Kitap oqıtyn ýnıversıtet», «Kitap oqıtyn kolledj», «Kitap oqıtyn mektep» jáne «Kitap oqıtyn pedagog». Qatysýshylar úshin qazaq jáne orys tilderinde 15 kitaptan turatyn arnaıy tizim bekitilip, sol shyǵarmalar negizinde túrli zııatkerlik saıystar ótti.
Baıqaý birneshe kezeńnen turdy – aldymen uıymdar men oqý oryndary deńgeıinde bastalyp, keıin aýdandyq, qalalyq jáne oblystyq kezeńderde jalǵasty. Nátıjesinde 462 adam jeńimpaz atanyp, onyń 156-sy birinshi oryn ıegeri boldy.
Joba aıasynda óńirlerde kitap oqý ortalyqtary jumys istep, turǵyndar arasynda kitapqa degen qyzyǵýshylyq artqany baıqaldy. Bul bastama tek bir rettik naýqan emes, ulttyń rýhanı damýyna baǵyttalǵan júıeli jumys retinde jalǵasyn tabady.
