Foto: Baıan Súleımenqyzy/ Egemen.kz
Qala kósheleriniń tazalyǵy men kommýnaldyq tehnıkalardyń úzdiksiz jumysyn qamtamasyz etetin «Astana Tazalyq» mekemesiniń óndiristik bazasynda qyzý jumys júrip jatyr. Bir boksta qar tazalaıtyn tehnıka jóndelse, endi birinde kóshelerge sý shashatyn mashınalardyń agregattary qalpyna keltirilýde. Osy jumystardyń arasynda kolledj stýdentteri de tájirıbeli mamandarmen birge eńbek etip júr.
Kásiporyn sheberi Nurjan Nurseıtovtiń aıtýynsha, stýdentter munda jaı baqylaýshy emes, naqty óndiristik proseske qatysýshylar retinde tájirıbe jınaqtaıdy.
«Biz kolledjben memorandým jasadyq. Ádette óndiristik praktıka kóp jerde aqysyz ótedi. Al bizde stýdentterge aı saıyn shamamen 150 myń teńge kóleminde jalaqy tólenedi. Olar kúnine tórt saǵat jumys isteıdi jáne sol eńbegi úshin aqy alady. Bul balalardyń mamandyqqa degen qyzyǵýshylyǵyn arttyryp, jaýapkershiligin kúsheıtedi», deıdi sheber.
Sheberdiń sózinshe, stýdentter tehnıkalyq qyzmet kórsetý men jóndeý jumystarynyń barlyq negizgi kezeńderimen tanysady. Olar aǵa mamandardyń baqylaýymen shetkalardy aýystyrý, starter jóndeý, radıatorlardy qalpyna keltirý, maı aýystyrý jáne túrli tehnıkalyq aqaýlardy anyqtaý jumystaryn atqarady.
«Biz stýdentterdi birden kúrdeli jóndeý jumystaryna jibermeımiz. Qaýipsizdik talaptary birinshi orynda. Alǵashynda baqylap, úırenedi. Keıin tájirıbe jınaqtaǵan soń qarapaıym jumystardy ózderi oryndaı bastaıdy. Qazir olardyń kóbi tehnıkanyń qurylymyn jaqsy meńgerip keledi», deıdi Nurjan Nurseıtov.
Astanada 100-ge jýyq kommýnaldyq qyzmetker Ánurandy shyrqady
Mekemede praktıkadan ótip jatqan Astana qalasyndaǵy Kásiptik-tehnıkalyq kolledjdiń úshinshi kýrs stýdenti Álibek Erkenov bul tájirıbeniń óz mamandyǵy boıynsha úlken múmkindik ekenin aıtady.
«Túrli tehnıkalarmen jumys isteýdi úırendik. Shetkalardy, pyshaqtardy aýystyrýdy jáne basqa da tehnıkalyq jumystardy meńgerip jatyrmyz. Eń bastysy – bul praktıka aqyly. Kóp jerde stýdentter tegin tájirıbeden ótedi, al biz jumys istep qana qoımaı, eńbekaqy alyp júrmiz», deıdi ol.
Álibektiń aıtýynsha, mundaǵy tájirıbe burynǵy óndiristik praktıkalardan áldeqaıda aýqymdy.
«Munda tehnıkalar kóp, jumys kólemi de úlken. Sheberler ár nárseni egjeı-tegjeıli túsindirip, is júzinde kórsetedi. Qazir kóshelerge sý shashatyn tehnıkanyń taratý júıesin jóndeýge qatysyp jatyrmyz. Osyndaı jumystar arqyly naqty tájirıbe jınaqtaımyz», deıdi stýdent.
Búginde kásiporynda alty stýdent óndiristik tájirıbeden ótip jatyr. Olar úsh aılyq óndiristik jáne dıplomaldy praktıka baǵdarlamasy aıasynda jumys isteıdi. Praktıka aıaqtalǵannan keıin stýdentter dıplom alyp, eńbek naryǵyna daıyn maman retinde shyǵýdy josparlap otyr.
Mundaı tájirıbelik baǵdarlamalardy uıymdastyrýǵa kásiporynnyń tehnıkalyq áleýeti múmkindik beredi.
Toqaev: «Taza Qazaqstan» tujyrymdamasyn iske asyrý – konstıtýsııalyq mindet
Mekemeniń Tehnıkany paıdalaný departamentiniń dırektory Tımýr Ahmetovtiń aıtýynsha kásiporyn tek qalanyń sanıtarlyq tazalyǵyn qamtamasyz etip qana qoımaı, bolashaq mamandardy daıarlaýǵa da erekshe kóńil bólip otyr.
«Qazirgi tańda kásiporyn balansynda 438 arnaıy tehnıka bar. Onyń ishinde traktorlar, avtogreıderler, samosvaldar, jol sypyratyn jáne shańsorǵysh tehnıkalar jumys isteıdi. Biz tehnıkalyq parkti 2021 jyldan beri kezeń-kezeńimen jańartyp kelemiz. Osyndaı aýqymdy óndiristik baza stýdentterdiń tájirıbe jınaqtaýyna jaqsy múmkindik beredi. Biz úshin kadr daıarlaý mańyzdy baǵyttardyń biri. О́ndiristik praktıka kezinde stýdentter shynaıy jumys prosesin kóredi, tehnıkalarmen jumys isteýdi úırenedi. Erteń olar eńbek naryǵyna shyqqanda daıyn maman retinde qalyptasady», deıdi Tımýr Ahmetov.
Depýtat «Taza Qazaqstan» jalpyulttyq qozǵalysyn qurýdy usyndy
Búginde jumysshy mamandyqtaryna suranys artyp keledi. Osy turǵydan alǵanda, «Astana Tazalyq» kásipornynyń tájirıbesi stýdentterge teorııalyq bilimdi óndiristik tájirıbemen ushtastyryp qana qoımaı, eńbek jolyn erte bastaýǵa múmkindik beretin tıimdi joba retinde baǵalanyp otyr. Al tájirıbe kezinde tólenetin 150 myń teńge kólemindegi jalaqy jastar úshin qosymsha yntalandyrý bolmaq.
