Bul másele Densaýlyq saqtaý mınıstrligi alańynda vedomstvo basshysy Aqmaral Álnazarova tóraǵalyq etken jıynda talqylandy. Basqosýǵa mınıstrliktiń vıse-mınıstrleri, Medısınalyq jáne farmasevtıkalyq baqylaý komıtetiniń, «Farmasııa» ókilderi, sondaı-aq taýarlardy tańbalaý men qadaǵalaýdyń biryńǵaı operatory Qazaqtelekom qatysty.
Jıynda dárilik zattardyń qozǵalysyn baqylaýǵa arnalǵan arnaýly sıfrlyq platforma tanystyryldy. Bul júıe dáriniń zaýyttan nemese shetelden ákelingen sátinen bastap, qoıma, dárihana arqyly halyqqa jetkenge deıingi jolyn tolyq kórsetedi. Ár qaptamanyń qaıda, qashan jáne kim arqyly ótkenin naqty ýaqyt rejıminde kórýge múmkindik bar.
Dárihanalar nege áleýmettik mańyzy bar dárilerdi satyp alýdan bas tartyp otyr?
Júıeni synaqtan ótkizý barysynda kóńil kónshitpeıtin derekter anyqtaldy. Atap aıtqanda, tegin medısınalyq kómektiń kepildik berilgen kólemi aıasynda halyqqa aqysyz taratylýy tıis 15 myńnan astam dárilik zattyń kommersııalyq dárihanalarda satylǵany tirkelgen. Sonymen qatar bir tańbalaý kodynyń 6,5 myńnan astam túri 385 myń ret qaıta paıdalanylǵan. Buǵan qosa, jaramdylyq merzimi ótip ketken 750-den astam dári qaptamasy saýdaǵa shyqqany belgili boldy.
Jıyn qorytyndysynda mınıstr sıfrlyq tańbalaý júıesin kúndelikti baqylaý quralyna aınaldyrýdy tapsyrdy. Bul dári-dármek aınalymyn retke keltirýge, bıýdjet qarjysynyń ysyrap bolmaýyna jáne eń bastysy, halyqqa sapaly ári qaýipsiz dáriniń jetýine jol ashýy tıis.
