Elbasy Nursultan Nazarbaevtyń «G-Global: XXI ǵasyr álemi» kitabyndaǵy «G-Global bastamasy adamzat taǵdyry týraly ǵalamdyq pikirtalasty ózekti etýge, qazirgiden de qaýipsiz álemdegi progress pen bolashaq úshin syndarly negizde barlyq ozyq kúshterdi biriktirýge qabiletti» degen baısaldy pikiri búginde jahandaný ıdeıasyna aınalǵan. Sonyń sátti kórinisi atalmysh forým aıasynda jan-jaqty aıqyndaldy.
Negizgi segiz baǵyttan turatyn forýmnyń basty oqıǵasy – «Amanat» syılyǵyna kandıdattardy irikteý. Qyzmeti jalpy adamı qundylyqtardy nyǵaıtýǵa septigin tıgizetin adamdardyń áleýmettik-ekonomıkalyq jáne qoǵamdyq ómir salasynda eleýli úles qosqany úshin tabystalatyn syılyqtyń jeńimpazdary tamyz aıynda EKSPO-2017 halyqaralyq mamandandyrylǵan kórmesi aıasynda marapattalatyny forým aıasynda resmı jarııalandy.
Keleli keńesti ashyp, forým jumysyna sáttilik tilegen aımaq basshysy Erlan Qoshanov Elbasy usynǵan «G-Global» bastamasyna búginde álemdik saıası ınstıtýttar, jahandyq saıasatkerler, Nobel syılyǵynyń laýreattary, yqpaldy sarapshylar oń pikir bildirip otyrǵanyna toqtaldy. Mıllıondaǵan paıdalanýshylar «G-Global» platformasyna kirýde. Al, onyń ıdeıalary orys, aǵylshyn, nemis, basqa da Eýropa tilderine aýdaryldy. Bunyń ózi ıgi bastamany jan-jaqty qoldaýdy kórsetedi, dedi ákim.
Forým mindetterine sáıkes, G-Global halyqaralyq jobasyn ilgeriletý – Elbasynyń «G-Global: XXI ǵasyr álemi» kitabynyń tusaýkeserin ótkizý, EKSPO-2017 halyqaralyq kórmesin jáne «Jasyl kópir» áriptestik baǵdarlamasyn nasıhattaý bolmaq.
Is-sharaǵa 800-den astam adam qatysyp, forým delegattary Qazaqstan halqy Assambleıasynyń qazaqtyń baı mádenıetine arnalǵan «Uly Dala qazynasy» atty kórmesin tamashalady. Sondaı-aq, jıyn barysynda «Álemdik kilem» erekshe pannosy tanystyryldy. Onda jasy, etnosy jáne dinı nanymdary ártúrli qolóner sheberleriniń eńbekteri kópshilik nazaryna usynylǵan.
Mıras Asan,
"Egemen Qazaqstan"
Qaraǵandy oblysy
