2016 jyldyń jeltoqsan aıynda Joǵarǵy Sot pen «Astana» HQO qyzmetkerlerin shetelde daıyndaý, dálireginde Londonda Law Society baǵdarlamasy boıynsha oqytýǵa 15 qyzmetkerge «Bolashaq» prezıdenttik stıpendııasyn bólý boıynsha Respýblıkalyq komıssııa sheshim shyǵarǵan.
Taǵylymdama baǵdarlamasy 6 aıǵa shaqtalǵan: sáýir aıy men qyrkúıek aıy arasynda akademııalyq jáne praktıkalyq komponentterden turady: 10 apta teorııa men 5 apta tájirbıeni Ulybrıtanııanyń zań jáne advokattyq fırmalarynda, sottarda ótedi.
Bul baǵdarlama shetelde mamandardy daıyndyqtan ótkizý, qazaqstandyq mamandardy álemniń eń myqty oqý oryndarynda daıyndaý baǵdarlamasy boıynsha túzilgen.
Kadrlardy shetelde daıyndaý boıynsha atqarylǵan is-sharalardy aıta kele, Memlekettik Hatshy G.Ábdihalyqova qazirgi kúni «Sottar jáne sot qyzmetkerleri» kategorııasynyń Prezıdenttik Bolashaq halyqaralyq stıpendııasyndaǵy basymdyqqa ıe mamandyqtardyń qatarynda ekenin aıtty.
«Bul Elbasynyń alǵa qoıǵan – zańnyń joǵarǵy mártebesin qamtamsyz etip, ınvestısııalyq klımatty jaqsartýǵa qatysty maqsatyndaǵydaı, sottardyń kvalıfıkasııasyn arttyrady», - dedi ol.
«Astana» HQO Basqarýshysy Qaırat Kelimbetovtiń aıtýynsha, halyqaralyq qarjy ortalyǵynyń qurylýynda adamı kapıtal asa mańyzdy, sol úshin de AHQO Bilim mınıstrligimen arnaıy baǵdarlamany qolǵa aldy.
«El ekonomıkasyna qarjy resýrstaryn tartyp, kapıtaldyń jańa tolqynynyń qurylýy úshin AHQO-ǵa halyqaralyq deńgeıdegi joǵarǵy kásibı mamandar qajet», - dedi ol.
О́z kezeginde QR Joǵarǵy Soty Tóraǵasy Qaırat Mámı stıpendıanttarǵa Elbasynyń Ult Josparynyń 24 qadamyn júzege asyrý úshin Astanada Halyqaralyq Arbıtrajdyq ortalyǵy qurylatynyn, onyń qyzmetiniń sot isinde aǵylshyn tili men anglosaksondyq quqyq júıesin qurý arqyly ınvestısııalyq daý-damaılardy sheshýge baǵyttalatynyna toqtaldy.
«Sondyqtan, anglosaksondyq quqyqtyq júıesin zertteýge baratyn, sheteldik tájirbıeni zertteıtin sottardyń arnaıy tobyn daıyndaý qajet», - dedi ol.
