Zańǵa sáıkes, erler 63 jasqa, áıelder 61 jasqa tolǵanda zeınetaqy tólemin alýǵa quqyly. Alaıda tólem avtomatty túrde taǵaıyndala salmaıdy. Mindetti zeınetaqy jarnalary esebinen tólem alý úshin, sondaı-aq memlekettik bıýdjetten bazalyq jáne yntymaqty zeınetaqyny rásimdeý maqsatynda azamattar turǵylyqty jeri boıynsha Azamattarǵa arnalǵan úkimet korporasııasyna ýaqtyly júginýge tıis. Muny zeınet jasyna tolýǵa on kún qalǵanda jasaýǵa bolady.
Zeınetaqy tólemderiniń barlyq túri ótinish berilgen kúnnen bastap esepteledi. Eger adam zeınet jasyna tolǵan soń baryp júginse, ótinish pen qujattar HQKO-da tirkelgen kún ótinish berilgen kún dep sanalady. Al zeınet jasyna deıin erterek júgingen jaǵdaıda, zeınet jasyna tolǵan kún negizgi merzim retinde alynady. Osyny eskermeı, keshigip júgingen azamattarǵa ótkizip alǵan kezeń úshin zeınetaqy tólemi taǵaıyndalmaıdy.
Memlekettik bıýdjetten tólenetin zeınetaqyny rásimdeý de ýaqytty talap etedi. Sebebi usynylǵan qujattar boıynsha eńbek ótili tekseriledi. Sondyqtan bul isti keıinge qaldyrmaı, aldyn ala qamdanǵan jón.
Aıta keterligi, BJZQ zeınet jasyna jetkenimen, tólemge ótinish bermegen azamattardy anyqtaý úshin jyl saıyn memlekettik korporasııamen birlesip salystyryp tekserý júrgizedi. Eger azamatqa bıýdjet esebinen bazalyq nemese yntymaqty zeınetaqy taǵaıyndalǵany anyqtalsa, qor keste boıynsha tólemderdi proaktıvti, ıaǵnı ótinishsiz-aq júzege asyrady. Bul rette buryn HQKO-ǵa usynylǵan bank derektemeleri paıdalanylady.
Al birinshi nemese ekinshi toptaǵy múgedektigi merzimsiz belgilengen azamattar zeınetaqy jınaqtaryn alý úshin BJZQ bólimshelerine nemese elektrondyq sıfrlyq qoltańba arqyly enpf.kz saıtyndaǵy, mobıldi qosymshadaǵy jeke kabınetke júginedi. Mundaı azamattar úshin kóshpeli qyzmet te qarastyrylǵan. Iаǵnı aldyn ala keńes alyp, qyzmetti qashyqtan alý múmkindigi tekseriledi.
Erikti zeınetaqy jarnalary esebinen tólemder jalpyǵa ortaq zeınet jasyna jetpeı-aq, 50 jastan bastap beriledi. Sonymen qatar múgedektigi bar adamdarǵa bul tólemder jasyna jáne múgedektik merzimine qaramastan taǵaıyndalady. О́tinish enpf.kz saıtyndaǵy jeke kabınet arqyly onlaın beriledi, al tólem kestesin salymshy ózi aıqyndaıdy. BJZQ-dan tólemder zeınetaqy jınaqtary tolyq taýsylǵanǵa deıin júrgiziledi.
Qajetti qujattardyń tolyq tizbesi, ótinish blankileri men olardy toltyrý úlgileri qordyń resmı saıtyndaǵy «Qyzmetter – Zeınetaqy tólemderi – Keste boıynsha tólemder» bóliminde ornalastyrylǵan.
Sonymen birge BJZQ salymshylardy alaıaqtyqtan saqtandyrady. Qor zeınetaqy tólemderin deldalsyz ári komıssııasyz rásimdeıtinin eske salady. Qyzmet kórsetý úshin aqy alynbaıdy, barlyq tólem tek zań aıasynda júzege asyrylady. Memlekettik organdardyń nemese qor qyzmetkerleriniń atynan habarlasqan adamdar eshqashan telefon arqyly jeke derekterdi, bank kartasynyń málimetterin nemese SMS-kodtardy suratpaıdy. Mundaı aqparatty talap etý – alaıaqtyqtyń aıqyn belgisi.
Ulttyq qordan 10 jyl ishinde jumsalmaǵan qarjy zeınetaqy shotyna aýdarylady
Mamandar zeınet jasyndaǵy azamattarǵa ǵana emes, olardyń jaqyndaryna da aqparattyq qaýipsizdik talaptaryn túsindirýdi usynady. Resmı derekkózge ǵana súıenip, saqtyq sharalaryn aldyn ala qabyldaý – zeınetaqy jınaqtarynyń qaýipsizdigin saqtaýdyń basty kepili.
