Sýretti túsirgen – Altynbek Qurmanov
Tarıhı derekterge súıensek, Tólebaı batyr HVII ǵasyrda ómir súrgen, ataqty Edige bıdiń ákesi. Tólebaı aty shyqqan batyrlyǵymen qosa, el-jurtyna ustalyqpen tanylǵan. Negizgi qańqasy aǵashtan, úrme terisi túıeniń qom terisinen jasalǵan kóne jádigerdi Tólebaı batyrdyń ózi ustaǵan eken. Jádiger áli kúnge isten shyqpaǵan kúıi saqtalyp tur.
– Tólebaı Janǵozyuly degen atamyz zamanynda temirdi óz qolymen qorytyp, shıti myltyq, zeńbirek soqqan. Temir qorytý qazaq dalasynda bastalǵany málim. Bul kórik – órkenıettiń belgisi. Erte kezde temirshi ustalar otty laýlatyp jaǵý úshin osy quralmen aýyq-aýyq úrlep otyrǵan. Kóriktiń ishine aýa jınalyp, ony basqan kezde arnaıy tútik arqyly otqa baǵyttalady. Qatty úrlengen aýanyń áserimen kómir mazdap janyp, temirdi soǵýǵa bolatyndaı joǵary temperatýraǵa jetken, – deıdi týrızm salasynyń úzdigi, belgili ólketanýshy Altynbek Qurmanov.
Bul kórik atadan balaǵa berilip, tórt ǵasyrǵa deıin óziniń qajettiligin joǵaltpaı kelgen. Altynbek aǵanyń atasy Qurman Ámiruly da ustalyǵymen tanylyp, keńes ókimeti kezinde kolhoz-sovhozdarda usta bolǵan. At taǵalap, soqa jóndegen, pyshaq pen balta soqqan. Qazaq arasynda ustalardyń kóbi kóship-qonýǵa yńǵaıly, jınalmaly kórikterdi paıdalanǵany málim. Tólebaı ata urpaqtarynda jınalmaly kórik te bar kórinedi. Al qarý-jaraq soǵatyn mynaý kórik kóbine úlken ustahanalarda ustalǵan.
«Bul kórikti ákem Jumat Qurmanuly da uzaq jyldar paıdalandy. Inim Qylyshbektiń ustalyq óneri bar. Jýyqta inim kóriktiń ábden keýip qalǵan úrme terisin jylqynyń terisin ıletip qaıtadan qaptady. Qazirgi ýaqytta qystaqtaǵy ustalyqqa ornatylyp, tolyqqandy jumys istep tur. Kerek-jaraqtyń barlyǵyn osy kórikti paıdalanyp, soǵyp alamyz. О́te yńǵaıly ári otty qajetti temperatýraǵa tez kóteredi. Abylaı zamanynan qalǵan qol kórik bizdiń áýletimizdiń qut-berekesi bolyp tur. Tarıhı jádigerdiń túpnusqasyn saqtap qana qoımaı, ustalyq ónerdi jańǵyrtyp júrgenimizdi maqtan tutamyz», deıdi ólketanýshy.
Pavlodar oblysy
