1 naýryzda atap ótiletin bul kún eldiń ótkeni men búginine úńilip, birlik pen baýyrmaldyqtyń qadirin sezinýge shaqyrady.
Alǵys aıtý kúni – taǵdyr tálkegine túsken túrli etnos ókilderin qazaq jeri baýyryna basyp, aman alyp qalǵan kezeń men búgingi beıbit kún úshin shúkirlikti eseleıtin mezet. HH ǵasyrdyń aýyr jyldary – Stalındik rejım kezinde Qazaqstanǵa túrli etnostar – 800 myńǵa jýyq nemis, 102 myń polıak, 550 myń Soltústik Kavkaz halyqtarynyń ókili, 18,5 myń Qıyr Shyǵystaǵy koreı otbasy qonys aýdardy.
Qazaqstanǵa kúshtep qonys aýdarylǵan mıllıondaǵan adamdy qazaq halqy jatsynbaı qabyldaı bildi. Al óz kezeginde elimizdegi túrli etnos ókilderi bul qaıyrly áreketti árqashan baǵalap, birlik týyn bıik ustaýǵa birlese kúsh salyp júr.
Sol sebepti bul merekeni meıirim merekesine balaýǵa bolady. Sondaı-aq máni tereń, mańyzy joǵary meıram tarıhı jady men ulttyq jaýapkershilikti qatar dáripteıtinin atap ótkenimiz jón.
Elimizde Alǵys aıtý kúni 2016 jyldan beri resmı túrde atap ótiledi. Bul kúnniń 1 naýryzǵa belgilenýi de beker emes. Sebebi 1995 jyldyń dál osy kúni Qazaqstan halqy Assambleıasy qurylǵan edi.
Jahanda geosaıası ahýal ýshyqqan qazirgi kezeńde merekeniń mańyzy arta túskendeı... Bul týraly Prezıdent Qasym-Jomart Toqaev óz quttyqtaýynda aıryqsha toqtaldy.
«О́zara qurmet kórsetý, ózgege janashyrlyqpen qarap, shynaıy tileýles bolý – ultymyzdyń boıyna sińgen qasıetter. Alǵys aıtý dástúri tól rýhanııatymyzdyń temirqazyǵy retinde el ishindegi senim men birlikti nyǵaıtýǵa zor yqpal etip keledi. Jaqyndarymyzǵa alǵys aıtý – olarǵa rýhanı qoldaý kórsetý, qıyn kezde qol ushyn sozý degen sóz. Qazirgi qubylmaly zamanda bul qasıettiń mán-mańyzy erekshe», dep atap ótti Memleket basshysy.
Memleket basshysy Alǵys aıtý kúnin ótkenge taǵzym jasap qana qoımaı, bolashaqqa jaýapkershilikpen qaraýǵa úndeıtin mereke retinde sıpattaıdy. Prezıdent pikirinshe, tarıhtaǵy qıyn kezeńderdi umytpaý – eldiń tutastyǵyn saqtaýdyń basty kepili.
Álem elderindegi – rızashylyq kúni
Júrekti jaqsylyqqa toltyratyn Alǵys aıtý qasıeti tek Qazaqstanǵa tán qundylyq emes. Álemniń kóptegen elinde de rızashylyq pen shúkirshilikke negizdelgen merekeler bar. Máselen, qarashanyń tórtinshi beısenbisi AQSh-ta Thanksgiving Day (alǵys aıtý, rızashylyq bildirý) kúni toılanady. Bul kúni AQSh halqy Jaratqanǵa, tabıǵatqa, ómirge jáne birlikke shúkirlik etip, alǵys jaýdyrady. Amerıkalyqtar úshin Thanksgiving Day otbasylyq mereke sanalady. Sondyqtan ataýly datada olar dastarqan basyna jınaldy. Kanadada qazan aıynyń ekinshi dúısenbisi – Thanksgiving (alǵys bildirý) kúni merekelenedi. Bul elde alǵys bildirý kúni egin jınaý maýsymymen tyǵyz baılanysty. Mereke máni jaqsylyqqa rızashylyq bildirý, tabıǵattyń syıyn baǵalaýmen astasyp jatyr.
Memleket basshysy el azamattaryn Alǵys aıtý kúnimen quttyqtady
Japonııa jurty 23 qarasha kúni Eńbekke alǵys aıtý kúnin atap ótedi. Atalǵan meıramda olar eńbek adamyn, óndiris pen qoǵamnyń damýyna qurmet kórsetip, qoǵamdaǵy árbir eńbektiń mańyzyn sezinýge, qadirin qashyrmaýǵa úndeıdi. Al 21 qyrkúıek kúni tórtkúl dúnıe halyqaralyq rızashylyq bildirý kúnin atap ótedi.
