«Janat Ýorrendi jeńgen kezde boıymdy keremet sezim bıledi. Maǵan kelgenge deıin Jaqııanov eshkim emes edi, ıaǵnı boks áleminde tanymal emes bolatyn. Bul jerde oǵan degen qurmetim tómen degen oı týmaýy kerek. Másele basqada. Ol áýesqoı boksta úlken jetistikterge jetpedi, Olımpıada chempıony atanbady, ıaǵnı «daıyn» turǵan chempıon emes edi. Ony jańa deńgeıge kóterý úshin kóp jumys isteý kerek boldy. Ýorrendi jeńedi dep eshkim kútpedi. Biraq men sendim. Sebebi, daıyndyq kezinde onyń chempıon bolatynyn kórdim. Ol men sııaqty. О́zi tap bolǵan kez kelgen kedergini jeńe alatyn adam. Men buryn da aıtqam, qazir de aıtamyn. Janatty baılap qoıǵanda ǵana jeńýge bolady. Janat nokdaýnnan keıin qaıta kúsheıgen kezde onyń ózine degen senimi búkil zalǵa sezildi.
Janatty úlken jekpe-jekter kútip tur. Djeımı Makdonnell, Raıan Barnett, Pol Batler syndy boksshylarmen judyryqtasýy múmkin. Jaqııanov Qazaqstannan shyqqan úshinshi chempıon. Bul úlken kórsetkish emes pe!
Gennadıı Golovkınmen birge Qazaqstanda boks keshin uıymdastyrý deısiz be? Bul Janattyń da, GGG-dyń da armany dep senimdi túrde aıtar edim», – dedi Rıkkı Hatton.
Osyǵan deıin Janat Jaqııanovtyń, Beıbit Shúmenovtiń (17-2, 11 KO) jáne ózge de boksshylardyń qatysýymen 9 qyrkúıek kúni Astanada boks keshi ótetini habarlanǵan bolatyn. Sonymen qatar, EXPO-2017 kórmesi kezinde orta salmaqta WBA (Super), IBO, WBC jáne IBF nusqalary boıynsha álem chempıony Gennadıı Golovkın sharshy alańǵa shyǵýy múmkin.
Aıta keteıik, Janat Jaqııanov sońǵy ret AQSh-tyń Ogaıo shtatynda amerıkalyq Roýshı Ýorrenmen qolǵap túıistirdi. 12 raýndtyń qorytyndysy boıynsha tóreshiler 115-111, 116-110, 111-115 degen upaı berip, otandasymyzdy jeńiske laıyq dep sheshti. Nátıjesinde, Janat WBA (Super) jáne IBO nusqalary boıynsha jańa álem chempıony atandy. Aıqasqa ol WBA tujyrymynyń ýaqytsha álem chempıony retinde qatysty.
Bul jekpe-jegine deıin jerlesimiz jaraqatyna baılanysty bir jarym jyl boıy sharshy alańǵa shyqpaǵan edi. Onyń ústine AQSh-ta eshkimmen judyryqtasyp kórmegen. Osy sebepti sarapshylar Roýshı Ýorrenniń jeńisine senimdi boldy.
Janat qazir álem chempıony. Endi ol kimmen judyryqtasýy múmkin? Al Rıkkı Hatton aıtqan úsh boksshy kim?
Djeımı Makdonnell – brıtan boksshysy, IBF, WBA belbeýleriniń ıegeri. 2010-2012 jyldary EBU nusqasy boıynsha Eýropa chempıony atanǵan. 31 jastaǵy sportshy búginge deıin 31 kezdesý ótkizip, 28-in jeńispen (onyń 13-i – nokaýt) aıaqtady. Eki ret qarsylasyna ese jiberse, bireýinde teń tústi. 2013 jyldyń mamyr aıynda IBF belbeýi úshin meksıkalyq Hýlıo Seıhamen kúsh synasyp, tóreshilerdiń sheshimimen jeńiske jetti. Al WBA ataǵyna 2014 jyldyń mamyr aıynda qol jetkizdi. Bul joly ol taılandtyq Tabtımbaenga Na Rahavatadan basym tústi.
Raıan Barnett – brıtan boksshy. 24 jastaǵy sportshy 15 ret jekpe-jek ótkizip, bárinde jeńiske jetti. Onyń toǵyzyn nokaýtpen aıaqtady. 27 aqpan kúni meksıkalyq Hoseafat Reıesti jeńgennen keıin Janatty kúsh synasýǵa shaqyrdy.
Pol Batler. Brıtan boksshysy osyǵan deıin 24 ret kezdesý ótkizdi. Onyń 23-in jeńip, bireýinde ese jiberdi. Kásipqoı rıngte 2010 jyldyń jeltoqsan aıynda debıýtin ótkizdi. 28 jastaǵy bylǵary qolǵap sheberi 2013 jyldyń 21 qyrkúıeginde chılılik Mıgel Gonsalesti jeńip, WBA tujyrymy boıynsha ınterkontınentaldy chempıon atandy. 2014 jyldyń 7 maýsymynda otandasy Stıýart Holldy tóreshilerdiń sheshimimen jeńip, IBF belbeýine ıe boldy.
Daıyndaǵan Aıan Ábdýálı «Egemen Qazaqstan»
