«Astana EKSPO-2017» Ulttyq kompanııasy men Memlekettik qyzmet isteri jáne sybaılas jemqorlyqqa qarsy is-qımyl agenttigi arasynda ótken jyly seriktestik kelisimine qol qoıylǵan bolatyn. Jıynda osy kelisimdi odan ári bekitip, jumysty jandandyra túsý jaıy sóz boldy. «Astana EKSPO-2017» UK» AQ qyzmetiniń ashyqtyǵyn qamtamasyz etý, sondaı-aq, jemqorlyqty joıýǵa yqpal etýde áleýmettik jaýapkershilikti arttyrý úshin eki jaqty tyǵyz qarym-qatynasta jumys isteý máselesi talqylandy.
Ulttyq kompanııa Basqarma tóraǵasy Ahmetjan Esimov atalǵan qujat der kezinde qabyldanyp, óz tıimdiligin kórsetkenin atap ótti. Qujat syndarlylyq pen ashyqtyq qaǵıdalaryna negizdelgen birlesken jáne kelisilgen áreketterdi júrgizý arqyly yntymaqtastyqtyń tıimdiligine múmkindik týǵyzdy.
A.Esimovtiń aıtýynsha, jasalǵan kelisim bas merdigerler arasyndaǵy jaýapkershilikti arttyra tústi. Ulttyq kompanııa jasasqan barlyq sharttarda eskerilgen jemqorlyqqa qarsy talaptar osyndaı kelisimderge qol qoıý kezinde qaterlerdi azaıtýǵa múmkindik týǵyzdy.
Sonymen qatar, taýarlar, jumys pen qyzmet kórsetýge degen baǵany belgileýdi kúsheıtýge baǵyttalǵan sharalar qolǵa alynyp, operasııalyq qyzmetti qospaǵanda, EKSPO nysandarynyń qurylysy barysynda 302 mlrd teńge únemdeldi. Qazaqstandyq qamtý ósip, jumys oryndary saqtalyp, jańa oryndar (50 myń) ashylyp, otandyq óndiriske (53,2 mlrd teńge soma kóleminde taýar satyp alyndy) qoldaý kórsetildi.
О́z kezeginde Qaırat Qojamjarov Ulttyq kompanııanyń qazirgi jetekshiligi qyzmetiniń aıqyndyǵyn atap ótti.
«Áriptesimizge yntymaqtastyq úshin alǵysymdy aıta otyryp, barlyq qabyldanyp jatqan sharalar arqasynda zańdylyqty saqtaý isinde eshqandaı keleńsizdikter oryn almaıtynyna sendirgim keledi», dedi jemqorlyqqa qarsy qyzmettiń jetekshisi.
Dınara BITIKOVA,
«Egemen Qazaqstan»
