Bul týraly búgin QR Parlamenti Senatynyń Plenarlyq otyrysynda sóılegen sózinde QR Ulttyq Bankiniń Tóraǵasy Danııar Aqyshev habarlady.
D. Aqyshev óz baıandamasynda, sonaý 2012 jyly Memleket basshysynyń Jarlyǵymen Kelisimshart jasasý táýekelderin táýelsiz baǵalaý ınstıtýttaryn jáne kollektorlyq agenttikterdi odan ári damytý tujyrymdamasy bekitilgenin, onda azamattardyń quqyqtaryn qorǵaýdy qamtamasyz etý úshin kollektorlyq qyzmetti memlekettik turǵydan retteýdi engizý boljanǵanyn eske túsirdi.
«Kollektorlyq kompanııalardyń is júzinde uzaq ýaqyt bolýyna jáne bizdiń ómirimizge keńinen enýine qaramastan, olardyń qyzmeti arnaıy zańnamamen rettelmeıdi jáne memleket ýákiletti organdary arqyly olardy baqylamaıdy», – dep atap ótti ol.
Ulttyq Bank Tóraǵasy «Kollektorlyq qyzmet týraly» Qazaqstan Respýblıkasy Zańynyń jobasy barlyq múddeli taraptardyń qatysýymen keńinen talqylanǵan zań jobalarynyń biri ekenin atap ótti.
«Jumysqa qoǵam qaıratkerleri, zańgerler, advokattar, kollektorlyq kompanııalar qatysty. Biz barlyq qatysýshylardyń múddelerin eskerýge tyrystyq», – dedi D. Aqyshev.
«Kollektorlyq qyzmet ne úshin kerek jáne ol nelikten paıda boldy? Munda eki aspektini qaraý kerek. Bir jaǵynan, bankter kredıtter beredi jáne qaryz alýshylar tarapynan mindettemeler oryndalmaǵan jaǵdaıda boryshty óndirip alady. Bul proseske zańdyq negizde kollektorlyq agenttikter tartylady, olardyń mindeti boryshty qaıtarý jumysyn júrgizý bolyp tabylady. Dál osy rettelmeıtin segmentte qazir qaryz alýshylarǵa qatysty quqyq buzýshylyqtar baıqalyp otyr» – dep atap ótti D. Aqyshev baıandamasynda.
Ekinshi aspekt bankter halyqtyń jáne kásiporyndardyń depozıtterin saqtaý mindeti.
Sondyqtan, onyń aıtýynsha, bankterde kredıtteri bar, sol sııaqty óziniń depozıtterin qaıtarýǵa múddeli halyqtyń barlyq toby bankpen aradaǵy kelisimniń talaptaryn oryndaýy kerek.
«Biz osy jaǵdaıda búgin «Kollektorlyq qyzmet týraly» jáne «Qazaqstan Respýblıkasynyń keıbir zańnamalyq aktilerine kollektorlyq qyzmet máseleleri boıynsha ózgerister men tolyqtyrýlar engizý týraly» zań jobalary osy qaǵıdattarǵa jaýap beredi jáne bereshekti óndirip alý boıynsha bolashaqtaǵy órkenıetti dıalogtyń negizin qalaıdy dep sanaımyz. Zań jobalary bank pen boryshkerdiń ózara qarym-qatynasyn is júzinde qaıta qurady. Bankter kredıttik táýekelderdi baǵalaýǵa saqtyqpen qaraıdy, al klıentter – kredıtor aldynda qarjylyq mindettemeleriniń tıisinshe oryndalýyna jaýapty bolý úshin tıisti deńgeıde qorǵalyp, habardar bolady», – dep tolyqtyrdy D. Aqyshev.
