«Antıfraýd» respýblıkalyq jedel-aldyn alý is-sharasy aıasynda Qostanaı oblysy polısııa departamentiniń kıberqylmysqa qarsy is-qımyl basqarmasy qyzmetkerleri Qostanaı qalasy polısııa bólimshesi kıberqylmysqa qarsy bólimshemen birlesip, «Ksell» AQ jáne «Qazaqtelekom» AQ uıaly baılanys operatorlarymen ózara is-qımyl jasaı otyryp, sondaı-aq oblystyq prokýratýranyń úılestirýimen SIM-box jabdyǵyn paıdalaný faktisin anyqtady.
«Jedel is-sharalar nátıjesinde ınternet-alaıaqtar úshin tehnıkalyq torap uıymdastyrdy degen kúdikpen Rýdnyı qalasynyń 22 jastaǵy turǵyny ustaldy», delingen habarlamada.
Polısııanyń málimetinshe, kúdikti bir mezgilde ártúrli baılanys operatorlarynyń kóptegen SIM-kartalarymen jumys isteýge múmkindik beretin SIM-box qurylǵysyn paıdalanǵan. Mundaı jabdyq telefon nómirlerin almastyrýǵa jáne ınternet arqyly alaıaqtyq qońyraýlar shalýǵa, qazaqstandyq nómirlerden qońyraý shalynǵandaı kórinis jasaýǵa qoldanylady.
Turǵylyqty jerin tekserý barysynda uıaly telefondar, SIM-kartalar, ınternet-roýter, sondaı-aq beınebaqylaý júıesi tárkilendi. Atalǵan jabdyq ınternet-servıster arqyly kelip túsetin qońyraýlardy qabyldaý jáne óńdeý úshin paıdalanylǵany anyqtaldy.
Aldyn ala málimetter boıynsha, ustalǵan azamat messendjerler arqyly zańsyz shemany uıymdastyrǵan belgisiz tulǵalardyń nusqaýlaryn oryndaǵan jáne olardyń áreketterin úılestirip otyrǵan.
Qazirgi ýaqytta polısııa qyzmetkerleri qylmystyq shemanyń uıymdastyrýshylary men basqa da qatysýshylaryn anyqtaý jáne ustaý maqsatynda jedel-tergeý is-sharalaryn júrgizýde.
«Kúdikti ustalyp, ýaqytsha ustaý ızolıatoryna qamaldy. Oǵan qatysty bultartpaý sharasyn tańdaý máselesi qaralýda. Tergeý amaldary júrgizilip, oqıǵanyń barlyq mán-jaıy jáne basqa tulǵalardyń qatysy anyqtalyp jatyr», dep naqtylady polısııa.
Polısııa departamenti ınternet-alaıaqtyqty anyqtaý jáne jolyn kesý jumystary jalǵasatynyn, mundaı shemalardyń uıymdastyrýshylary men qatysýshylary zańǵa sáıkes jaýapkershilikke tartylatynyn atap ótti.
