Abaı oblysynda Memlekettik keńesshi Erlan Qarın men «Ádiletti jáne progressıvti Qazaqstannyń halyqtyq Konstıtýsııasy úshin!» jalpyulttyq koalısııasy músheleriniń óńir jurtshylyǵymen kezdesýi ótti.
Sapardyń basty sharasy Abaı atyndaǵy oblystyq kitaphanada aımaq belsendilerimen ótken kezdesý boldy. Jıynǵa 500-ge jýyq adam jınaldy. Talqylaýǵa máslıhat depýtattary, qoǵamdyq keńes músheleri, saıası partııalar, Qazaqstan halqy Assambleıasy, ardagerler uıymdary, bıznes, bilim berý, densaýlyq saqtaý, sport, ǵylym salalarynyń ókilderi jáne jastar qaýymdastyǵy qatysty.
Dıalogtyń negizgi taqyryby – jańa Konstıtýsııa jobasy men aldaǵy 15 naýryzda ótetin respýblıkalyq referendým. Memlekettik keńesshi Erlan Qarın qujatty daıyndaý barysyndaǵy negizgi prınsıpterge egjeı-tegjeıli toqtaldy. Ol bul jumystyń ashyq júrgizilgenin jáne qoǵamnyń keńinen atsalysqanyn, al azamattardyń usynystary e-Otinish jáne eGov sıfrlyq platformalary arqyly qabyldanǵanyn atap ótti.
Onyń aıtýynsha, usynylyp otyrǵan ózgerister memlekettik basqarý júıesiniń ornyqtylyǵyn nyǵaıtýǵa, bılik ınstıtýttarynyń ókilettikteri men jaýapkershiligi arasyndaǵy teńgerimdi kúsheıtýge, sondaı-aq eldiń strategııalyq basymdyqtary retinde adam kapıtalyn, bilimdi, ǵylym men ınnovasııany damytýǵa baǵyttalǵan.
Erlan Qarın jańa Konstıtýsııa tek quqyqtyq qujat qana emes, sonymen birge qoǵamnyń qundylyqtaryn aıqyndaıtyn jáne memlekettik saıasattyń «adamǵa baǵdarlaný» prınsıpin bekitetin zamanaýı qoǵamdyq kelisim ekenin atap ótti.
«Jańa Konstıtýsııada kez-kelgen sanattaǵy, kez-kelgen áleýmettik jáne kásibı topta, kez-kelgen jastaǵy adam óz múddeleri qamtylǵanyn kóre alady. Bul ne degen sóz? Bul árbir azamat óz quqyqtaryn qorǵaýda senimdi konstıtýsııalyq kepildikterge ıe boldy dep aıtýǵa bolady. Jańa konstıtýsııaǵa sáıkes barlyq azamattar jasyna, áleýmettik jáne ózge de jaǵdaıyna qaramastan eńbek etý jáne demalý quqyǵyna, bilim alýǵa jáne densaýlyǵyn saqtaýǵa, sóz bostandyǵy men beıbit jıyndar ótkizýge, jeke derekterin qorǵaýǵa qolaıly qorshaǵan ortaǵa ıe bola alady», dedi Memlekettik keńesshi.
Sapar aıasynda Memlekettik keńesshi Abaı oblysynyń shyǵarmashylyq zııaly qaýym ókilderimen de kezdesti. Munda mádenıetti damytý, tarıhı jadyny saqtaý jáne ulttyq biregeılikti nyǵaıtý máseleleri nazarǵa alyndy. Qatysýshylar memleket qyzmetiniń qaǵıdattary tizbesine tarıhı-mádenı murany saqtaý jáne ulttyq mádenıetti qoldaý týraly tarmaqtyń engizilýine qoldaý bildirdi.
Referendým kezinde shalǵaıda júrgen azamattar qalaı daýys beredi?
Budan bólek, Jalpyulttyq koalısııa músheleri belsendi jastarmen, qoǵamdyq birlestiktermen jáne óńirdegi túrli sala ókilderimen jeke kezdesýler ótkizip, jańa Konstıtýsııa jobasynyń negizgi erejeleri men onyń el damýyndaǵy mańyzyn talqylady. Esterińizge sala keteıik, Qazaqstan Respýblıkasynyń jańa Konstıtýsııasynyń jobasy boıynsha respýblıkalyq referendým 2026 jylǵy 15 naýryzda ótedi.
