Qoıylymdy avtor M.Ahmanovtyń bárimiz jaqsy biletin «Jyl basy kim bolady?» ertegisi negizinde jazǵan. Degenmen sál ózgeshelik bar. Qoıylym Qara túnektiń jer álemdi qarańǵylyq qursaýynda ustap, óz bıligin júrgizýinen bastalady.
Jer betin túnek basyp, jan-janýarlar ábden azap shegedi. Osy kezde Kúnshýaq pen Aıbatyr Qara túnektiń jolyna tosqaýyl jasap, jer betine shýaǵyn shashady. Olar jan-janýarlardy jınap, jerde qaıtadan tártip ornatpaq bolady. Sóıtip Kúnshýaq pen Aıbatyrdyń shaqyrýy boıynsha Túıe, Tyshqan, Sıyr, Barys, Qoıan, Ulý, Jylan, Jylqy, Qoı, Meshin, Taýyq, It, Dońyz jınalady. Alaıda olardy «Jyl basy kim bolady?» degen suraq mazalaıdy. Árqaısysy jyl basy retinde ózin kórgisi keledi. Osy kezde Tyshqan utymdy sheshim tabady. Ol ortaǵa shyǵyp: «Bárimiz sharshadyq, uıyqtaıyq. Erteń tań atady, sol kezde kim birinshi bolyp kúnniń shapaǵyn kórse, sol jyl basy bolsyn!», deıdi. Barlyq jan-janýar osy baılamǵa kelisedi. Osy kezde Túıeniń órkeshine minip alǵan Tyshqan kúndi birinshi bolyp kóredi. Osylaısha ol jyl basy atanady. Qalǵan janýarlar men ańdar da osy kezekpen on eki aıdyń ıesi bolady. Tek óz boıyna sengen Túıege ǵana aı ataýy buıyrmaıdy. Qoıylym sońynda Qyzyr ata sahnaǵa shyǵyp, jyldyń bastalýymen quttyqtap, barshasyna baq-bereke tileıdi.
Osy bir áserli ertegini Mýzykalyq jas kórermen teatry ujymy 50 mınýttyq spektaklge syıǵyzǵan. Qoıylymnyń qoıýshy-rejısseri Eralhan Myrzahmet ertegini jymdastyryp, balanyń qabyldaýyna saı sahnalap shyqqan. Sondaı-aq Tyshqannyń (Aıdana Jeteshova) shıqyldap sóılep, dorbasyndaǵy táttisin balalarǵa úlestirýi, Sıyrdyń (Aqerke Amangeldi) sabyrly qalpynan bir sátke de taımaı bastan-aıaq kúısegen bolyp sendire somdaýy, Qoıannyń (Arýjan Temirhanova) birese úrkektep, birese batyldanyp ketetin qylyqtary, Ulýdyń (Maıra Marǵulanqyzy) óte baıaý ári kúlkili qımyl-áreketi, Jylannyń (Aıdana Bolat) ysyldap aıbat shegýi, Qoıdyń (Arýjan Baǵzat) eki qoshqarmen birge sahnaǵa kóterilip, kúldire sóıleýi, basqa da janýarlar men ańdardy somdaǵan teatr artısteriniń oıyny kishkentaı kórermenderdi birese kúldirip, birese oılantyp, shat-shadyman kúıge bóledi.
Osylaısha elordalyq baldyrǵandar Naýryz merekesinde ýaqyt pen tabıǵat týraly kóne túsinikti qaıtadan eske túsirip, merekeniń mánin, on eki jyldyń paıda tolý tarıhyn, sahna óneri men ondaǵy án-bı arqyly tereń tarazylady.
