Forýmǵa taılandtyq 300-den astam kásipker qatysty. Olardyń arasynda aýyl sharýashylyǵy, energetıka, hımııa ónerkásibi, týrızm, kólik-logıstıka, mashına jasaý jáne onlaın-saýda salalaryndaǵy taılandtyq jetekshi kompanııalardyń basshylary boldy.
Jıynǵa qatysýshylar Qazaqstan men Taıland arasyndaǵy saýda jáne ınvestısııalyq yntymaqtastyqtyń negizgi vektorlaryn, Shyǵys pen Batys, Soltústik pen Ońtústiktiń arasyndaǵy tranzıttik hab retindegi Qazaqstannyń kólik-logıstıkalyq múmkindikterin, sondaı-aq, Astanada ótetin EKSPO-2017 halyqaralyq mamandandyrylǵan kórmesine Taıland tarapynyń qatysýyn talqylady.
Forým barysynda taılandtyq resmı tulǵalar men kásipkerler Qazaqstan Prezıdenti Nursultan Nazarbaevtyń «Qazaqstannyń Úshinshi jańǵyrýy: jahandyq básekege qabilettilik» atty Joldaýynda qamtylǵan basym baǵyttar jóninde pikir almasty.
Qazaqstannyń Taılandtaǵy tótenshe jáne ókiletti elshisi Marat Esenbaev elimizdiń álemniń básekege qabiletti 50 eliniń qataryna qosylǵanyn atap ótti. «Elimizdiń damyǵan 50 eldiń qatarynan kórinýi Memleket basshysy Nursultan Nazarbaevtyń salıqaly saıasatynyń arqasynda júzege asty. Memleket basshysynyń úshinshi jańǵyrý jónindegi Joldaýy Qazaqstannyń ozyq 30 eldiń qataryna qosylýyna keńinen jol ashady», – degen elshi taılandtyq isker top ókilderin Qazaqstannyń jańa ekonomıkalyq modelin júzege asyrýǵa belsendi qatysýǵa shaqyrdy.
Taılandtyń Halyqaralyq saýdany damytý departamenti dırektorynyń orynbasary Somdet Sýsomboon forýmda Qazaqstan men Taıland Koroldigi ózara yntymaqtastyqtyń joǵary áleýetine ıe ekenin, sondyqtan, eki eldiń kompanııalary barlyq múmkindikterdi tıimdi paıdalana otyryp, ekonomıkalyq qatynastardy nyǵaıtýy qajettigin sóz etti. «Qazaqstandaǵy saıası turaqtylyq pen el Úkimetiniń bıznes-klımatty jaqsartý baǵytyndaǵy sharalary taılandtyq kásipkerlerdiń qyzyǵýshylyǵyn oıatýda», – dedi S.Sýsomboon.
Sondaı-aq, Taılandtyń Halyqaralyq saýdany damytý departamenti dırektorynyń orynbasary ústimizdegi jyldyń maýsym-shilde aılarynda óz eliniń Saýda mınıstri men Energetıka mınıstri Qazaqstanǵa saparmen baratyny josparlanyp otyrǵanyn jetkizdi.
Jıyn barysynda elimizdiń kólik-logıstıka salasyndaǵy múmkindikteri jáne tranzıttik áleýeti keńinen tanystyryldy. Onda «KTZ Express» AQ-tyń atqarýshy dırektory Sergeı Anashkın men «Eır Astana» áýe kompanııasynyń ókili Mánshúk Qýatbaıqyzy sóz sóıledi.
Forým aıasynda paneldik otyrystar uıymdastyryldy. Oǵan Taıland ónerkásipshileri federasııasy bas hatshysynyń orynbasary Ashok Ýpata, Taılandtyń shaǵyn jáne orta bınesti damytý ofısi bas dırektorynyń orynbasary Akkarabhong Srısýpandıt, Taılandtyń týrızm basqarmasynyń dırektory Iýmporn Djıragalvısýl jáne «Index Creative Village» kompanııasynyń atqarýshy dırektory Krıengkra Kanchanapokın qatysty.
Bıznes-forým qorytyndysy boıynsha, bıylǵy jazda saýda-ınvestısııa salasyna qatysty taılandtyq 6 mıssııanyń (150-den astam kompanııa) Qazaqstanǵa saparyn júzege asyrýǵa qatysty ýaǵdalastyqqa qol jetkizildi.
Aıta keteıik, taılandtyq kompanııalar qazaqstandyq bıznes-qaýymdastyqpen tyǵyz baılanys ornatýǵa múddeli ekenderin bildirýde. Ásirese, olardy Qazaqstan ekonomıkasyna ınvestısııa salý jáne elimizge kelip bıznespen shuǵyldaný máseleleri qyzyqtyrýda.
