Táýelsizdik qurdastarymen kezdesti

Shaharǵa jaqynda oblys ákimi Berdibek Saparbaev arnaıy keldi. Aldymen aımaq basshysy qala ákimi Aıbek Kárimovpen birge shahardyń ortalyǵynda salynyp jatqan dene shynyqtyrý-saýyqtyrý kesheniniń qosalqy ǵımaratyn kórdi. 1988 jyly qurylysy bastalyp, aıaqsyz qalǵan bul nysandy «Týǵan jerge taǵzym» aksııasy aıasynda qaıta turǵyzýǵa bekingen jergilikti kásipkerler eken. Qurylys joba­sy­men tanysqan soń óńir basshysy bul ju­mystarǵa «Bıznestiń jol kartasy» aıa­synda qoldaý kórsetý múmkindigin qaras­tyratynyn aıtty. Budan soń atalmysh ǵımaratpen irgeles turǵan burynǵy zooveterınarııa ınstıtýty ǵımaratyn qal­pyna keltirmek bolǵan azamattardyń jobasymen tanysty. Kezinde órtenip ketip, berik qabyrǵalary ǵana qalǵan ny­san saýda, ákimshilik, oıyn-saýyq kesheni bolyp qaıta salynbaqshy. Qurylysty 2014 jyly aıaqtaý kózdelýde. Sondaı-aq, ákim memlekettik jeke-men­shik áriptestik aıasynda jańadan ashyl­ǵan 75 oryndyq «Aqbulaq» bala­baqshasynyń tynys-tirshiligimen de ta­nysty. Qazir mektepke deıingi bul mekemede 60 bala tárbıe alyp jatyr. Olardyń 50-i memlekettik toptarǵa, al 10-y jekemenshik topqa barady. Osylaısha, 3 pen 5 jas aralyǵyndaǵy balalarǵa rýhanı, adamgershilik tárbıe berýge jańashyl sıpatta erekshe den qoıylyp otyr. Osydan soń B.Saparbaev Semeıdegi 343 kvartalda oryn tepken jańadan salynǵan dene shynyqtyrý-saýyqtyrý kesheniniń bas ǵımaratynda bolyp, onyń ishki quryly­syn, sporttyq jabdyqtar men jattyǵý zaldaryn, júzý basseınin tamashalap shyqty. Tipti, úlken tennıs alańynda ózi de qalaqpen dop uryp baıqap kórdi. Ja­ńa­dan boı kótergen bul keshendi salýǵa memleketten 1 mıllıard 120 mln. teńge bó­lin­gen bolatyn. Aýmaǵy 10 myń sharshy metrdi alyp jatqan alyp ǵımaratta bir mezette 700 adam sporttyń ár túrimen aına­ly­sýyna barlyq múmkindik jasalǵan. 3 sport zaly, júzý basseıni bar. Memleket jastar saıasatyna jan-jaqty qoldaý kórsetip keledi jáne aldaǵy ýaqytta da solaı bola beredi, deıdi bul jaıynda túsinik bergen jergilikti bılik ókilderi. Tanystyrýlardan soń meımandar Semeı jastary uıymdastyrǵan «Biz – táýelsizdiktiń qurdastarymyz» atty forýmǵa qatysty. Bul sharany ótkizýge 1991 jyly týǵan 3 myńnan astam bozbala men boıjetken atsalysty. Munan keıin oblystyń ár túkpirinen kelgen jas órender jalyndy jyrlary men áýezdi ánderin kópshilik nazaryna usyn­dy. Olar óz sózderinde qoǵamdaǵy ult­aralyq kelisim men tatýlyq qana ta­bystarǵa bastaıtynyn aıtyp, árbir qazaq­standyqty táýelsizdigimizdiń 20 jyl­dy­ǵyn osylaı birlikpen atap ótýge shaqyrdy. Sondaı-aq, stýdentter qaýymy men sportshylar memlekettiń qamqorlyǵyna rıza ekenin jetkizip, ystyq yqylas­taryn bildirdi. Táýelsizdiktiń 20 jyldyǵy qarsa­ńyn­da Shyǵys Qazaqstan oblysynda birneshe mektep, balabaqsha, áleýmettik nysandar boı kóterip, joldar jón­delmek. El tarıhyndaǵy aıtýly merekege árbir turǵyn óz úlesin qosýǵa daıyn. Dáýlet SEISENULY, Qýanysh QOJAEV, jýrnalıst. Semeı.