Apatpen arpalysqandar

Chernobyl atom elektr stansa­syndaǵy alapat apatty umytý múmkin emes. Osydan tup-týra shırek ǵasyr buryn bolǵan jary­lys­tan 190 myń tonna radıaktıvti zat aýaǵa tarady. 5 mıllıon adam zardap shekti. Adamzat ómirine, qor­shaǵan ortaǵa zor qaýip tóndirgen apat oshaqtaryn zalalsyz­dan­dy­rýǵa Qazaqstannan 35 myńǵa jýyq adam qatysty. Taǵdyr­dyń jazýymen janqııarlyq erliktiń ǵala­mat úlgisin kórsetken olardy qa­laı qurmettesek te jarasady. Ǵa­bıt Mú­sire­pov aýdanynda Cher­no­byldaǵy zardaptaryn joıýǵa belsene atsalys­qan 40 adam tu­rady. Olardy ulyq­taýǵa arnalǵan ıgilikti is mazmun­dylyǵymen este qaldy. Saltanatty sharany aýdan ákimi Marat Tasmaǵanbetov ashyp, sol bir qasiretti kúnderdegi adam­dar­dyń birligi, yntymaǵy eshqashan umytylmaıtynyn jetkizdi. Ol Semeı jerinde 456 jarylys oryn alǵanyn, Elbasy Nursultan Na­zarbaevtyń tegeýrindiligi arqa­syn­da jabylǵanyn, elimiz ıadrolyq qarýdan erikti túrde bas tartyp, tórtkúl álemge úlgi kórsetkenin aıta kelip, apat zardaptaryn joıý­ǵa belsene qatysqan jandarǵa alǵys hattar men baǵaly eskertkish syılyqtar tapsyrdy. 6 adam sanatorııge joldama aldy. Solardyń biri Vladımır Botnarenko alǵash­qy­lar­dyń qatarynda Ýkraına jerine attanyp, jarty jyldaı jumys istepti. Jetpisti alqymdap qalǵan ol sol kezderi qyryqtyń qyrqasynan endi asqan eken. – Osydan 5 jyl buryn 50-shaqty edik. Jyl ótken saıyn qa­tarymyz sırep keledi. 16 adam mú­gedekter qatarynda. Shynyn aıtsam, dál búgingideı marapat kút­pep edim. Buryndary dál osy­laı basymyz qosylyp kórmepti. Tipti aramyzda bir-birin bilmeıtinder de bar kórinedi, – dep Vladımır Tımo­feevıch aǵynan jaryl­dy. Áný Aqpanov, Nıkolaı Gosh, Ar­týr Eslámov, Pavel Radchenko sekildi azamattar tepse temir úzetin 25 jasynda ajalmen betpe-bet kelse, Vladımır Fransýzov nebári 20 jasta bolǵan. Ákimdiktiń sharaǵa tııanaqty daıyndalǵany kórinip turdy. Aýdan ákiminiń orynbasary Altyn­shash Taı­shabaevanyń aıtýynsha, ony ót­kizýge aýdan ákimi Marat Imanbaıuly bastama kóterip, 700 myń teńge ból­gizipti. Chernobyl zardaptaryn joıýǵa qatysqan azamattarǵa dastarqan jaı­y­lyp, jergilikti kórkemóner­pazdar konsert qoıdy. О́mir ESQALI. Soltústik Qazaqstan oblysy, Ǵabıt Músirepov aýdany.