Bizde kóp ýaqyt boıy damyǵan elderdiń qataryna kirý tek ekonomıkalyq damý men jańa tehnologııalar arqyly júzege asady degen sholaq túsinik boldy. Iаǵnı, biz baı bolsaq jáne tehnologııalardy paıdalansaq, aldyńǵy qatarly elge aınalamyz degen oıǵa basymdylyq berilip keldi. Alaıda, damýdyń eń birinshi alǵysharty – bul mádenıet pen qundylyqtardyń ońtaıly ózgerýi. Jańasha oılaý bolmasa, damý da bolmaıtyndyǵy bizdiń jáne aınalamyzdaǵy kórshilerimizdiń tájirıbesi kórsetip otyr.
Qazaq qoǵamynda sońǵy 10-15 jyldar ishinde kúrdeli ózgerister oryn aldy. Ál-aýqattyń artýy jáne qala halqynyń kóbeıýi jańasha oılaıtyn áleýmettik toptyń paıda bolýyna alyp keldi. Dál osy top úshin Prezıdenttiń maqalasynda aıtylǵan pragmatızm, básekege qabilettilik, ashyqtyq sekildi qundylyqtar mańyzdy bolyp tabylady. Olar – jaqsy bilim alǵan, birneshe til biletin, óz dástúrimen qatar zamanaýı ómir saltyn ustanatyn jańa qazaqtar býyny. Jáne bir erekshelik, bular eldegi qoǵamdyq-saıası ómirge yqpal etýge múddeli belsendi top. Bıliktiń jańa ıdeologııany damytýy arqyly dál osy topqa súıenýine múmkindigi bar.
Qazirgi jahandyq ózgerister kezeńinde ár memleket ózindik ustanymyn qalyptastyrý ústinde. Elbasy maqalasyna súıensek, Qazaqstandaǵy joǵary bılik progress pen ashyqtyq jolyn tańdap otyr. Endigi másele – maqalada aıtylǵan ıdeıalardyń saıası shyndyqqa aınalýy.
Serik BEISEMBAEV,
Álemdik ekonomıka jáne saıasat ınstıtýtynyń sarapshysy
