Jıyn barysynda teatr basshysy Erlan Bilál el ıgiligi úshin jasalyp otyrǵan jobanyń halyqqa usynylýymen jınalǵan qaýymdy quttyqtady.
– Elbasymyz N.Á.Nazarbaevtyń «Bolashaqqa baǵdar: rýhanı jańǵyrý» atty mazmuny tereń maqalasynda aıtylǵan rýhanı jańǵyrý men zamanaýı ilgerileýdiń júgenin tartyp ustap, júgin qatar kóterisetin azamat tárbıeleı alý men bilimdi, jan-jaqty urpaǵy bar elderdiń kóshbasshysy bolý qaı-qaısymyzdyń da kókeıimizge qonary haq. Elbasynyń «Maqsatqa jetý úshin bizdiń sanamyz isimizden ozyp júrýi, ıaǵnı odan buryn jańǵyryp otyrýy tıis», «Jańǵyrý eldiń ulttyq – rýhanı tamyrynan nár alýy kerek» degen sózderiniń astarynda el múddesin basty qundylyq dep baǵalaý jatyr. Endeshe, bul súbeli oıdy barlyǵymyz da qoldaýǵa tıispiz, – dedi Erlan Bilál.
Teatrdyń beldi ártisi Jasulan Baısalbekov maqalada aıtylǵan mańyzdy máselelerge toqtala kelip: «Táýelsiz Qazaqstannyń kún saıyn qaryshtap damýy jolyndaǵy basty qaǵıdalarynyń beriktigi negizinde Otanymyz túbegeıli jańǵyrý men jańa múmkindikterge jol ashýǵa qabiletti bolyp otyr. Barsha qazaqstandyq jastar Nursultan Ábishulynyń qundylyǵy zor maqalasynan úlken jiger, bolashaqqa degen senim aldy. Elbasy «Synaptaı syrǵyǵan ýaqyt eshkimdi kútip turmaıdy, jańǵyrý da tarıhtyń ózi sııaqty jalǵasa beretin prosess», dep jastardy zaman talabyna saı jan-jaqty bolýǵa úndedi. Biz artylǵan úmit pen senimdi aqtaýǵa aıanbaı eńbek etýge daıynbyz», dedi.
– Zamanǵa saı bolý, álemdik sana qaǵıdalaryn qalyptastyrý, damyǵan eldermen Otanymyzdyń terezesi teń turýdy basty maqsat etken Elbasymyz N.Á.Nazarbaevtyń syndarly saıasaty qazaqstandyqtardyń múddesine baǵyttalǵan, ulttyq tarıh, búginimiz ben bolashaǵymyz arasyndaǵy dánekerleýshi kópir ispetti. Bilim salasy, tárbıe, otbasy, ár adamnyń tulǵalyq qalyptasýy, ultqa degen sheksiz mahabbat qashanda júregimizde saqtalýy kerek ekeni maqala mazmunynan tys qalmaǵan. Atameken aýylymyzdyń qadir-qasıetin de umytpaýǵa shaqyrǵan bastamada ulttyq bolmysymyzdy saqtaý máselesi jan-jaqty qamtylýy bárimizdi qýantady, – dedi teatrdyń jas ártisteri atynan sóz alǵan Saltanat Baqaeva.
Arman OKTIаBR,
«Egemen Qazaqstan»
ALMATY
