Arhıv dırektory, tehnıka ǵylymdarynyń doktory Borıs Japarov júrgizgen kezdesýdiń basty ereksheligi – Elbasy kótergen ıdeıaǵa sheteldik ǵalymdardyń kózqaras bildirýi boldy. Kıbernetıka men júıeli zertteýler salasy boıynsha Halyqaralyq ozyq zertteýler ınstıtýtynyń dırektory jáne dırektorlar keńesiniń tóraǵasy kanadalyq Dj.Lasker men Japonııadaǵy Rısýmeıkan ýnıversıtetiniń qurmetti professory, ekonomıka ǵylymdarynyń doktory Keı Karasava barsha qazaqstandyqtar aldyna qoıylyp otyrǵan rýhanı talaptarǵa baılanysty basqosýǵa arnaıy shaqyrylǵan Almaty qalasyndaǵy qoǵam qaıratkerlerimen birge oı qosyp, Qazaqstan ǵalymdarymen birlese atqaratyn ortaq jobalar jóninde áńgimeledi.
Prezıdent arhıvi dırektorynyń orynbasary, tarıh ǵylymdarynyń doktory Qaırat Álimǵazınov baǵdarlamalyq maqalanyń mańyzy týraly arnaıy baıandama jasap, ulttyq sana-seziminiń damýyna yqpal etetin negizgi tetikterdi ataı otyryp, halqymyzǵa rýhanı azyq bolatyn tereń mazmunyn tarata aıtty. Qoǵamdyq sanany jańǵyrtý jónindegi ıdeıa osy ýaqytqa deıin júrgizilgen reformalardyń zańdy jalǵasy bolýymen mánin baıytyp, qundylyǵyn arttyra túspek.
Ulttyq ǵylym akademııasynyń akademıgi Ábdiqappar Áshimov te saıası jáne halyqaralyq turǵydan kóshbasshylyqqa ıe búgingi Qazaqstannyń jańa kelbeti týraly áńgimeledi.
Elektrtehnıka men kompıýter ǵylymy salasy boıynsha myńdaǵan shákirt tárbıelep, álemniń belgili ýnıversıtetterinde dáris oqyp, kóptegen ǵylymı jobalarǵa jetekshilik jasaǵan E.Lasker Qazaqstandy burynnan biletinin, qazba baılyǵy mol, saıası turaqty el retinde tanıtynyn jáne Qazaqstanǵa aqparattandyrý júıesi, matematıkalyq jáne kompıýterlik modeldeý mamandyǵy boıynsha bilim alyp jatqan magıstranttar men doktoranttarǵa dáris oqýǵa arnaıy shaqyrylǵanyn jetkizdi. Elbasy N.Nazarbaevtyń jańa baǵdarlamalyq maqalasy týraly estip, mazmunymen tanysqannan keıin Prezıdenttiń elde túbegeıli jańarý úderisterin júrgizýge baǵyttalǵan bastamasyn qoldaıtynyn aıtty.
Al jerinde tabıǵı qazba baılyǵy joqtyń qasy bolyp esepteletin, alaıda adam eńbegi asa qundy kapıtal bolyp sanalatyn Japonııadan kelgen qurmetti professor Keı Karasava Qazaqstanǵa alǵash ret 1990-jyldary Ekonomıka mınıstrliginiń shaqyrýymen kelse, bul joly akademık Á.Áshimovtiń usynysymen stýdentter men ǵylymı izdenýshilerge arnaıy dáris oqýǵa kelgen. Keı Karasava bolashaǵy zor jas memlekettiń ár jetistigi halyq senimin nyǵaıtyp, erteńge úmitin ulǵaıta tússe degen tilegin bildirdi.
Aıgúl AHANBAIQYZY,
«Egemen Qazaqstan»
ALMATY
