Búgin Beıbit Shúmenovtiń qandaı jaraqat alǵany jáne qanshalyqty kúrdeli ekeni anyqtaldy. Boksshynyń menedjeri habarlaǵandaı, Beıbit sparrıng-jattyǵý kezinde oń kózinen aýyr jaraqat alǵan.
"О́kinishke oraı, Beıbit aldaǵy kezdesýdi ótkize almaıdy. Sparrıng kezinde oń kózinen qatty jaraqat aldy. Qolǵaptyń bas barmaǵy kózine tıip ketip, zaqym keltirdi" dedi onyń promoýteri Shyńǵys Shúmenov.
Jergilikti dárigerler otandasymyzdyń qarashyǵyna tıgen zardapty anyqtap, der kezinde operasııa jasaǵan. Aldyna-ala boljam boıynsha, Beıbit Shúmenovtiń bul operasııadan keıin qalpyna kelýi úshin shamamen 2-3 aı ýaqyt qajet bolady. Qazir ol aýrýhanada emes, Las-Vegastaǵy úıinde emdelýde.
Bul Beıbittiń sońǵy 2 jylda jekpe-jek aldynda alǵan úshinshi jaraqaty. Ol buǵan deıin 2015 jylydyń maýsym aıynda Bı Dj Floreske qarsy kezdesý Beıbittiń jaraqat alý sebebinen 1 aı keıinge shegerilgen edi. Al, ekinshi jaraqatyn Beıbit dál sol jyldyń sońynda, ıaǵnı jeltoqsan aıynda álemniń eks-chempıony bolǵan polshalyq Kshıshtof Vlodarchıkke qarsy jekpe-jek qarsańynda alyp, kezdesý ótkizilmegen edi. Keshe Shúmenovtiń úshinshi jaraqaty týraly BAQ betterinde habarlandy.
Beıbit Shúmenovtiń ylǵı jekpe-jek aldynda jaraqat alatynyn eskergen Qazaqstan kásipqoı boks federasııasynyń vıse-prezıdenti Vıktor Demıanenko boksshyǵa qazaqstandyq jas bylǵary qolǵap sheberlerine promoýter bolýdy usyndy.
— Sońǵy ýaqytta Beıbittiń jaraqat alýy tym jıilep ketti. Sondyqtan, men oǵan basqa kásippen aınalysýdy, onyń ishinde, promoýter bolýdy usynamyn. Múmkin, osy kásipte Shúmenovtiń joly bolyp qalar. Ol kásipqoı boksta biraz tájirıbe jınaqtady ǵoı, sondyqtan, oǵan promoýterlik qıynǵa soǵa qoımas. Elimizde talanatty jas boksshylar óte kóp, solarǵa promoýterlik jasap, AQSh-ta ózderin kórsetýge múmkindik jasasa» deıdi V.Demıanenko.
Aıta keteıik, Shúmenovtiń jaraqatyna baılanysty 30 sáýir kúni Las-Vegasta kýbalyq Iýnıer Dortıkoske qarsy bolatyn jekpe-jek ótpeıtin boldy. Shúmenov-Dortıkos jekpe-jegi osymen ekinshi ret toqtatytylǵanynda aıta ketken jón. Eń alǵash qos boksshy arasyndaǵy kezdesý bıyl 11 aqpanda ótý kerek bolatyn. Alaıda, Caribe Promotions kompanııasy jekpe-jekti uıymdastyrý quqyǵynan aıyrylyp, kezdesýdi uıymdastyra almaı qalǵan edi. Sonan soń, bul jekpe-jek ótkizý quqyǵyn Tom Braýnnyń TGB Promotions ıelenip, birinshi aýyr salmaqtaǵy WBA nusqasy boıynsha Álem chempıony tıtýlyna arnalǵan jekpe-jek 30 sáýirge josparlanǵan edi.
Álı BITО́RE,
«Egemen Qazaqstan»
