Qazaqstan halqy Assambleıasynyń ókilderi men elordalyq etnomádenı birlestikterdiń músheleri qatysqan alqaly jıynda Memleket basshysynyń «Bolashaqqa baǵdar: rýhanı jańǵyrý» maqalasy qyzý talqylandy. Sondaı-aq, olar Elbasy maqalasynyń basty baǵyttary men «Qazaqstandaǵy 100 jańa esim» jobasy boıynsha usynystar ázirleý kerektigine nazar aýdardy.
QHA múshesi, Astana qalasynyń ózbek etnomádenı birlestiginiń tóraǵasy Sherzod Pýlatov, Memleket basshysy halyq arasyndaǵy dostyq peıildi keńinen nasıhattap, jaıdary qarym-qatynasty árkez tý etýge barynsha jaǵdaı jasap kele jatqanyn atap ótti.
«Keshe ǵana Elbasymyz óz halqyna rýhanı jańǵyrý jolyn nusqap, elimizdiń jańa tarıhı kezeńge aıaq basqandyǵyn, qaıta túleýdiń aıryqsha mańyzdy eki prosesi – saıası reforma men ekonomıkalyq jańǵyrýdy qolǵa alǵanymyzdy aıtty. Osy maqsatta kózdelgen jumystardyń bári de der kezinde jáne barynsha tıimdi júzege asatyndyǵyna senim bildirdi. Prezıdentimiz «men halqymnyń taǵylymy mol tarıhy men yqylym zamannan arqaýy úzilmegen ulttyq salt-dástúrlerin aldaǵy órkendeýdiń berik dińi ete otyryp, árbir qadamyn nyq basýyn, bolashaqqa senimmen bet alýyn qalaımyn», dep tutas qoǵamnyń jáne árbir qazaqstandyqtyń sanasyn jańǵyrtýdyń birneshe baǵytyn aıqyndady. Bul − bizder úshin baǵyndyrar bir beles», – dedi Sh.Pýlatov.
Sondaı-aq, otyrysqa qatysýshylar rýhanı jańǵyrý maqsaty boıynsha naqtylap aıtylǵan elimizdiń myqty, ári jaýapkershiligi joǵary Birtutas Ult bolý úshin bolashaqqa qalaı qadam basamyz jáne osy maqsat jolynda buqaralyq sanany qalaı ózgertemiz degen máseleni de kún tártibine shyǵardy.
«Otandy súıý – babalardan mıras bolǵan uly murany qadirlep, ony kózdiń qarashyǵyndaı saqtap, keıingi urpaqqa amanat etip, tabystaý azamattyq boryshymyz. Eldiń tutastyǵy men birligi, tatýlyǵy men tynyshtyǵyn tý etý, tek laýazymdy adamdardyń ǵana jumysy emes, bul barshamyzdyń da azamattyq paryzymyz. Sondyqtan, qoǵamdaǵy árbir qyzmet etip otyrǵan ujym Elbasymyzdyń halyqqa arnaǵan Joldaýyn qoldaıtynymyzdy bildire otyryp, jahandyq deńgeıdegi EKSPO-2017 kórmesiniń kóńildegideı ótýine úles qosqanymyz lázim», – dedi Sh.Pýlatov.
Aıta keteıik, ulttyq biregeılik pen qoǵamdyq kelisimdi damytýdyń jáne QHA-nyń elimizde etnosaralyq dıalog ornatýdaǵy róli talqylanǵan jıynda «Turan-Astana» ýnıversıtetiniń ekonomıka jáne ınnovasııalyq bıznes kafedrasynyń professory Oraq Álıev te ulttyq biregeılikti saqtaý, Qazaqstannyń evolıýsııalyq damý joly týraly pikir bildirip, árbir otandasymyzdyń óz biregeıligin túsinýi el birliginiń basty quraly ekenin aıtty.
Joldybaı BAZAR,
«Egemen Qazaqstan»
