Búginde dámhanalarǵa barsańyz Qazaqstannyń ózge óńirlerinde kezdespeıtin taǵamdarǵa tapsyrys bere alasyz. Máselen, kınodan kórgenińiz bolmasa aıaǵyńyz jetpegen, múmkin, ómirińizdiń sońyna da jolyńyz túspeýi múmkin Afrıkanyń ózen, kólshiginde ósetin jaıynnyń eti. Marhabat!
Osyndaıda eske túsedi. 2004 jyly «Egemen Qazaqstan» gazeti tilshileriniń quramynda Úrimshige jolymyz túsken. Kúıtiń qalasyndaǵy kezdesýden soń dámge otyrdyq.
Aınalmaly ústel, ústi qaıysqan taǵam. Qaq ortasynda buqtyrylǵan alyp tasbaqa tórt aıaǵy tórt jaqqa ketip tarbıyp jatyr. Taǵy da biz bilmeıtin baqa, shaıan etterinen
daıarlanǵan taǵamdar. Tiksinip qaldyq. Delegasııany bastap barǵan aǵamyz qabaǵyn shytty. Álgilerdi dastarhannan alyp ketýdi ótindi. Sıyr, qoı, jylqy etinen jasalǵan dámdi ǵana ákelýdi buıyrdy.
Kútýshi jaq ań-tań. «Biz bul qymbat taǵamdardy asa qadirli qonaqtar úshin ushaqpen ózge jerlerden aldyramyz», degen.
Al ońtústiktiń kafe, meıramhanalary ekzotıkalyq taǵamdardy ushaqpen esh jerden aldyrmaıdy.
Qazir Afrıka somy ońtústiktiń birtalaı aýdandarynda ósirilip jatyr. Jaqynda Túlkibas aýdanyndaǵy bir sharýashylyqtan kórdik. Sharýashylyq ıesi áleýmettik jeliden Afrıka somy týraly oqyp, paıdasyna kóz jetkizgennen keıin Reseıde ósirilip jatqan balyq pıtomnıginen aldyrǵan eken. Olarmen tájirıbe almasyp, jaıyndy ósirýdiń qyr-syryn ábden meńgerip alǵan. Bul sharýashylyqtyń tıimdiligi, tórt túlikti ósirý sııaqty óris qýalap tabanyńnan tozbaısyń. Qysqy jem-shóp úshin ala jaz boıy adyr qýalap, shóp shappaısyń. Belgilengen mezgilinde kesek-kesek et tastap, tamaqtandyrsań bolǵany. Túıeni túgimen jutýǵa daıyn bul jaıyndaryńyz naǵyz der shaǵyna jetkende 120 kelige deıin tartady eken. Bir qunan qoıdyń salmaǵyn oıǵa alyp, bir jaıynnan túsetin paıdany esepteı berińiz.
Baqtııar TAIJAN,
«Egemen Qazaqstan»
Ońtústik Qazaqstan oblysy
