«Qarsylasym 30 jasta. Onyń kemshilikteri men myqty tustaryn ázirge bilmeımin. Osyǵan deıin ótkizgen bir ǵana jekpe-jegin kórip shyqtym. 28 sáýir kúni bári belgili bolady dep oılaımyn», – dedi 26 jastaǵy boksshy.
Ashat Ýálıhanov sońǵy aıqasyn jeltoqsan aıynda ótkizgen bolatyn. Odan beri bes aıǵa jýyq ýaqyt ótti.
«Men úshin biraz úzilis bolyp qaldy. Qazir tek reıtıngtik kezdesýler ótkizip júrmin. Bes aıda bir de bir aıqas ótkizbeýime vızalyq qıyndyqtar sebep boldy. Osy aralyqta Qazaqstanǵa vıza jasatý úshin baryp keldim», – dep túsindirdi boksshy.
Sondaı-aq, Ashat bıyl qansha kezdesý ótkizetinin naqty aıta almady.
«Bári ýaqyttyń enshisinde. Ázirge eshnárse aıta almaımyn. Is júzinde bári jaqyn arada belgili bolady», – dep qysqa qaıyrdy.
Bir qyzyǵy, qazaqstandyq bylǵary qolǵap sheberiniń qarsylastary tek latynamerıkalyqtar. Bapkerleri stıli jaǵynan yńǵaıly boksshylardy tańdaı ma eken álde kezdeısoqtyq pa? Ýálıhanov bul turǵyda jattyqtyrýshylarynyń oıyn bilmeıtinin, kezdeısoqtyq bolar dedi.
Al muhıttyń arǵy betindegi ómirge tolyqtaı úırendi me? «Bári jaqsy. Amerıkaǵa tolyqtaı úırendim. Tek til bilmeýim azdap qıyndaý bolyp tur», – dedi Ýálıhanov.
Astanada EXPO-2017 kezinde boks keshi uıymdastyrylatyny belgili. Ashat óz elinde judyryqtasqysy keletinin jasyrmady.
«О́z elimde, jankúıerlerimniń aldynda sharshy alańǵa shyqqym keledi. Biraq qaı jerde judyryqtasý kerek ekenin men sheshpeımin. Eger uıymdastyrýshylar menedjerimmen kelisimge kelip jatsa, Qazaqstanda qýana-qýana jekpe-jek ótkizer edim», – dedi 26 jastaǵy bylǵary qolǵap sheberi.
Ashat Ýálıhanov birinshi jartylaı orta salmaqta bokstasady. Birneshe aı buryn ol óz dıvızıonyndaǵy úzdik boksshynyń esimin ataǵan bolatyn.
«Qazirgi ýaqytta Terenes Kroýford chempıon. Osy salmaqta ony úzdik dep sanaımyn. Birinshi jartylaı orta salmaqta myqty boksshylar jeterlik. Al ózime keler bolsam, olardyń deńgeıine jetý úshin kóp daıyndalýym kerek», – degen edi qazaqstandyq boksshy.
Terens Kroýford – amerıkalyq boksshy. Áýesqoı boksta 2007 jyly panamerıkalyq oıyndardyń chempıony atanǵan. Kásipqoı boksta 2014-2015 jyldar aralyǵynda jeńil salmaqta WBO belbeýine ıe bolǵan. Qazirgi ýaqytta birinshi jartylaı orta salmaqta WBC (2016 jyldan beri), WBO (2015 jyldan beri), The Ring (2016 jyldan beri) tujyrymdary boıynsha álem chempıony. Kásipqoı rıngte 30 jekpe-jek ótkizip, bárinde jeńiske jetken. 21 kezdesýin ýaqytynan buryn aıaqtady.
Aıta keteıik, Ashat Ýálıhanov – Jambyl oblysy, Shý aýdanynda týǵan. Kásipqoı boksqa deıin Dúnıejúzilik boks serııasynyń eki dúrkin chempıony – «Astana Arlans» komandasynyń namysyn qorǵady. Qazirgi ýaqytta boksshy Madııar Áshkeevpen birge bir komandada jattyǵyp júr. Kásipqoı boksta eki ret judyryqtasty. Alǵashqy jekpe-jegin ótken jyldyń tamyz aıynda meksıkalyq Denıel Bastıenmen ótkizdi. Kezdesýdiń úshinshi raýndynda tóreshiniń gong dybysyn estimeı, meksıkalyqty uryp jiberýine baılanysty Ashatqa tehnıkalyq jeńilis berdi. Al jeltoqsan aıynda nıkaragýalyq Karlos Agıleramen qolǵap túıistirip, ekinshi raýndta tehnıkalyq nokaýtpen jeńiske jetti.
