«Kórme ashylmastan bir aı buryn keńse ǵımaratynda qaýipsizdikti qamtamasyz etý ortalyǵy óz jumysyn bastaıdy, bul ortalyqpen IIM-de qurylǵan vedomstvoaralyq jumys toby tyǵyz baılanys jasap, kórme barysynda týyndaǵan máselelerdi tikeleı sheship otyratyn bolady. EKSPO aýmaǵynda polısııa bólimi, al kórme aýdanynda órt sóndirý deposy quryldy, sondaı-aq Astana áýejaıynda jáne jańa temir jol vokzalynda jelilik polısııa bólimi jumys isteıdi. Qoǵamdyq tártipti kúzetýge 5 myńnan astam qyzmetker tartylady. Sonyń ishinde 3300-i áskerı qyzmetker, IIM oqý oryndarynyń 500 kýrsanty jáne ofıseri, sonymen birge jeke kúzet uıymdarynyń 630 qyzmetkeri jáne elimizdegi JOO-nyń shet tilin erkin meńgergen 174 stýdenti bar. Bul qurylymdardyń barlyǵy qaýipsizdikti saqtaý jáne tekserý júrgizý boıynsha, sondaı-aq aǵylshyn tilinen arnaıy oqý kýrsynan ótken. Buǵan qosa Astana qalalyq IID-niń shet tilin biletin 200 qyzmetkeri iriktelip, árbir EKSPO nysanyna bekitildi. Astana qalasy TJD-nyń 100 shaqty qyzmetkeri, 11 tehnıkalyq birlik jáne 5 tikushaq tótenshe jaǵdaılardy eskertý jáne órt qaýipsizdiginiń aldyn alý boıynsha arnaıy toptyń quramyna endi. Astana qalasyndaǵy áýejaıda jáne biryńǵaı qyzmet kórsetý ortalyǵynda kóshi-qon sharalarynan ótý úshin kórmede kóshi-qon qyzmetiniń beketteri uıymdastyrylady», dedi Talǵat Musaqanov.
Sonymen qatar, spıker qaýipsizdik sharalarynyń jan-jaqty pysyqtalyp jatqanyn alǵa tartty. Jáne 1 maýsymnan bastap kórme aıaqtalǵansha ishki ister organdarynyń jeke quramy kúsheıtilgen qyzmet kestesine kóshiriledi.
Raýan Qaıdar,
«Egemen Qazaqstan»
