Boks keshi Qytaıdyń Sane qalasynda ótti. Jerlesterimiz jınaqylyq tanytyp, 3:2 esebimen jeńiske jetti.
Aldymen sharshy alańǵa 52 kılodaǵy boksshylar kóterildi. Nurlan Aqurpekov Ánýar Muzapparovqa senim artqan eken. О́kinishke qaraı, Ánýar senimdi aqtaı alǵan joq. Qytaılyq qarsylasy Gýo Jannan jeńilip qaldy.
Gýo Jan – Ánýar Muzapparov – 3:0 (49:46, 49:46, 49:46).
Osy maýsymda jankúıerlerdi jelpindirip júrgen jigitterdiń biri Zákir Safıýllın. Shymkenttik saıypqyran 60 kıloda judyryqtasyp, Sen Vandy sabasyna túsirdi. Osylaısha tarazy basy teńesti.
Sen Van – Zákir Safıýllın – 1:2 (46:49, 46:49, 48:47).
Qazaq boksshylarynyń 69 kıloda ózgelerge utylýy sırek ekenin kóziqaraqty jankúıer jaqsy biledi. Dál osy salmaqta tórt birdeı Olımpıadanyń altynyn enshilegen bizdiń oǵlandar basqa jarysta da jeńile qoımaıtyn. Biraq bul joly Áýlıeata óńiriniń týmasy Aslanbek Shymbergenov Hýrıchabılıgten aılasyn asyra almady.
Rıchabılıge Hýrıchabılıg – Aslanbek Shymbergenov – 3:0 (49:48, 49:48, 49:48).
Esesine, Arman Rysbek bapkerler shtaby men jankúıerlerdiń úmitin aqtady. Buǵan deıin Tarazda reseılik Pavel Sılıagındi qapy qaldyrǵan Arman bul joly Lıd Vandy nokaýtqa túsirip, esepti ekinshi ret teńestirdi. Arman Rysbek dál qazir sporttyq babynda júr. Ulttyq qurama bapkerleri osy boksshynyń áleýetin eskerip, álem chempıonatyna aparsa da bolar edi.
Lıd Van – Arman Rysbek (Rysbek 1-raýndta tehnıkalyq nokaýtpen utty).
Sońǵy sheshýshi kezeńde kerekýlik Oljas Boqaev komandaǵa jeńis syılady. Ol Jıbao Vandy tórtinshi raýndta tehnıkalyq nokaýtpen utty.
Jıabao Van – Oljas Boqaev (Boqaev 4-raýndta tehnıkalyq nokaýtpen utty).
Sonymen, toptyq kezeńdi birinshi orynmen aıaqtaǵan «Astana Arlandary» týrnırdiń kelesi kezeńine joldama aldy.
Aıta keteıik, WSB aıasyndaǵy jetinshi maýsymnyń toptyq kezeńinde 12 komanda óner kórsetti. Olar úsh qurlyq boıynsha bólindi. Toptyq kezeńniń qorytyndysy boıynsha kelesi kezeńge ár toptan úzdik komanda ǵana shyǵady. Azııa qurlyǵynyń toby eń qıyny bolǵandyqtan, bul joly eki komandaǵa múmkindik berildi. Al Eýropa men Amerıka qurlyǵynan tek bir komanda ǵana pleı-off kezeńine joldama aldy.
Bek TО́LEÝOV,
jýrnalıst
ASTANA
