Bul jaıynda oblystyq kásipodaq uıymynyń tóraǵasy Ǵanı Qarabekov bylaı degen:
− Shymkent – ataýynyń ózi aıtyp turǵandaı jasyl qala. Biraq, qala ortalyǵyndaǵy parkter, skverlerdiń ishine qurylys júrgizilip, jasyl qala degen mártebesinen aıyrylyp qala jazdady. Sondyqtan, oblys ákimi Janseıit Túımebaev qala kóshelerin abattandyrý máselesine aıryqsha kóńil bólýde. Saıabaqtar sanyn kóbeıtý úshin «Shatqal» baǵdarlamasyn qabyldap, búginge deıin 400 myńǵa jýyq kóshet otyrǵyzyldy.
Osyndaı ıgi isten kásipodaq uıymy qalaı shet qalady. Jol boıynda aǵashtar óskenimen, jıegindegi jer tómpeshik, oıly-qyrly bolyp, jabaıy shóp ósip, qalanyń árin qashyrýda. Adamdar «mynany Úkimet nemese oblys qashan qolǵa alady?» dep ketpenniń sabynan qaraýyl qaramaı, ózderi iske kirisýi kerek. Bir úılerge barasyń, aýlasy botanıkalyq baq, syrtqa attap shyqsań aınalasy aıtaqyr. Bir qalada turyp jatqan soń seniki, meniki bolmaı, tazalyǵy, ádemiligi úshin patrıottyq sezimmen jumys jasaý kerek. Bizdiń bastamamyzdyń maqsaty osy. Sol sebepti, «Gúldi qala» degen uranmen gúl otyrǵyzý aksııasyn bastap kettik.
Oblystyq kásipodaq uıymy men salalyq kásipodaq odaqtarynyń kúsh salýymen bul kúni Qazybek bı jáne Jeltoqsan, Á.Jylqyshıev kósheleriniń qıylysyndaǵy aryq atyzdar tazalandy, trotýar jıegindegi jer tegistelip, gúlder egildi.
– «Biz osynda turamyz». Árbir shymkenttik óz qalasy úshin osyndaı maqtanysh sezimde bolý kerek, – deıdi kásipodaq uıymynyń tóraǵasy. – Bizdiń bul aksııamyz bir kúndik emes, ár senbi saıyn ózimizdiń aýlamyzǵa senbilik jasaımyz. Biz búgingi aksııany ári qaraı jalǵastyrý úshin oblystyq Kásipkerler palatasyna usynamyz. Olar ári qaraı basqa mekemege tabystaıdy. Adamdardyń birlese kúsh salýynan keıin Shymkent naǵyz jasyl qalaǵa, gúlge oranǵan ádemi qalaǵa aınalady.
Mundaǵy úlken maqsat – Elbasynyń Ulttyq jańǵyrý jónindegi «Egemende» jarııalanǵan maqalasyna týǵan jerin túletken azamattardyń jaýaby. Biz áńgimege tartqan kásipodaq músheleri sóziniń túıini osyǵan saıady.
Baqtııar TAIJAN,
«Egemen Qazaqstan»
Ońtústik Qazaqstan oblysy
