Fotograftardyń obektıvine ilingen qas-qaǵym sátten turatyn sýretterdiń barlyǵy derlik halqymyzdyń salt-dástúrin, ulttyq oıyndardy, turmysyn, uly dalanyń ásem tabıǵatyn pash etedi.
− Qazir fotoǵa túsirýmen áýestenýshiler kóp. Alaıda, kánigi fotograftardyń qoltańbasy tipti ózgeshe ekeni belgili. Olar sýretke óziniń jan jylýyn salady, sýret kádimgideı jandy, ómirdiń ózi sekildi áser beredi. Al mundaı sýretti túsirýge bilim men talant, erinbeıtin eńbek kerek, – dedi kórkemsýret galereıasynyń meńgerýshisi Saıa Qalıeva.
Kórmeniń ashylý saltanatynda sóz sóılegender kóńil tolqynystaryn jasyra almady.
− Maǵan úsh sýret erekshe áser qaldyrdy. Sergeı Mıronovtyń «Qonaqjaılylyq» jáne «Arman», Oleg Iаblochkınniń «Aqsham aldyndaǵy sáıgúlikter» atty sýretteri óte sátti, shynaıy shyqqan. Aýyldaǵy samaýryn qoıyp jatqan qazaq áıelderi, jylqy sulýlyǵynyń tabıǵat qubylysymen astasýy, sonymen qatar, aýyldaǵy eski úı aldynda oıynshyq mashınamen oınap otyrǵan uldyń sýreti nazaryńdy eriksiz aýdarady, – dedi belgili qylqalam sheberi Oleg Kýskov.
Kórmege barlyǵy 29 sýret qoıyldy. Kórermenge kózaıym bolǵan sýret avtorlarynyń aty-jónin oqyrmanǵa ataı ótkendi jón kórdik. Olar da «jegeni jantaq, arqalaǵany altyn» jýrnalıster qaýymynan: Georgıı Shapovalov, Igor Valter, Ermurat Bekmuhamedov, Oleg Iаblochkın, Sergeı Mıronov, Vladımır Motorıko, Nıkolaı Kýdınov, Aıbek Júzbaı, Baǵdat Ahmetbekov, Sergeı Feldman, Muhtar Sıbanbaev, Ivan Marmalıdı, Nıkolaı Savchenko, Nıkolaı Solovev.
Názıra JÁRIMBETOVA,
«Egemen Qazaqstan»
QOSTANAI
