Zań jobasyn tanystyra otyryp, QR bilim jáne ǵylym mınıstri Erlan Saǵadıev Qazaqstannyń joǵary oqý oryndarynyń akademııalyq jáne basqarý erkindigin keńeıtý degenimiz JOO-larǵa stýdentterdi qabyldaýǵa, qurylym tártibin, bilim berý baǵdarlamalarynyń mazmunyn anyqtaýǵa jáne ǵylymı-bilim berý qyzmeti boıynsha enshiles uıymdardy qurýyna quqyq berýdi bildiretinin atap ótti. Buǵan deıin osyndaı artyqshylyqtar tek ulttyq JOO-larda ǵana bolǵan.
Budan ózge, Ulttyq biliktilik sheńberine biriktirile otyryp bilim berý baǵdarlamalaryn ázirleý qaǵıdasy engiziletin bolady. Osynyń arqasynda JOO-lar bilim berý nátıjeleri men ózderiniń quzyrettilikteriniń negizinde derbes bilim berý baǵdarlamalaryn ázirleı alatyn bolady. Sondaı-aq, joǵarǵy oqý oryndaryn lısenzııalaý júıesi de ózgeredi. Eger bastapqyda tek mamandyq lısenzııalanǵan bolsa, endigi zań jobasy qabyldanǵan soń jalpy daıyndaý baǵyty da lısenzııalanatyn bolady.
Búgingi tańda joǵarǵy jáne joǵarǵydan keıingi bilim berýde shamamen 600 mamandyq bar, jańa tásil engizilgennen keıin daıarlaýdyń 10 baǵyty paıda bolady. Onyń ishinde EYDU elderindegideı, JOO-lardyń 600-den de kóp derbes bilim berý baǵdarlamalary bolady.
Sonymen qatar, stýdentterge de eki baǵyt boıynsha oqýdyń derbes jolyn qalyptastyrý quqyǵy beriletin bolady, ıaǵnı pánderdi tereńinen meńgerý jáne pánderdi qosymsha meńgerý. Qosymsha meńgerýde bir mamandyqta oqyp júrgen stýdentter óz bilimderin tolyqtyrý úshin qosymsha mamandyqty da ıgerýge múmkindik alady.
