– Aıdar, birneshe kún buryn ǵana sizdiń quramadan ketkenińizdi estidik. Mundaı qadamǵa ne sebep boldy?
– Munyń eki sebebi bar. Birinshisi, meniń arqam men tizemnen alǵan jaraqatyma baılanysty bolsa, ekinshisi – basshylarǵa daıyndyǵym men kórsetkishterimniń unamaýy.
– Basshy degende siz kimdi meńzep tursyz?
– Shynymdy aıtsam, ol jaǵyn naqty bilmeımin. Maǵan solaı jetti. «Ket», dep te eshkim aıtqan joq. Biraq meniń nátıjelerim basshylyqtyń kóńilinen shyqpaǵanyn túsindim.
– Sonda halyqaralyq jarystardaǵy 5-6-oryndardyń ózi jetkiliksiz degen sóz be?
– Solaı shyǵar. Maǵan jalpylama baǵa berildi. Jetkilikti dárejede jattyqpaı júrgenim de aıtylǵan. Azıadaǵa men qatysqan joqpyn. Al Ýnıversıadada júldeli oryndarǵa ilige almaǵynymdy ózińiz de bilip tursyz. Siz aıtqan oryndar sonshalyqty tómen nátıje emes shyǵar, biraq oǵan ózimniń de kóńilim tolmady. О́zge áriptesterim medal taǵyp turǵanda, meniń qur qol bolǵanymdy jaýapty mamandar da qup kórmegen. Soǵan qaraǵanda meje joǵarylaǵan sekildi.
– Siz bul pikirmen kelistińiz ǵoı? Aıtpaǵym, sportshylardyń barlyǵy jaraqat alady, sonan soń sportqa qaıta oralyp jeńiske jetip jatady. Bálkim, áli nátıje de jaqsarar ma edi...
– Bul sheshimge men qalaı áser ete alamyn?! Qolymnan kelgenshe jattyǵyp júrdim, eger muny da az dese, men ne istemekpin?
– Al siz bul týraly qaı ýaqytta estidińiz?
– Maýsym aıaqtalǵan soń. Bizge eki aptalyq demalys bergen. Sol ýaqytta jınalys ótip, meniń máselem talqylansa kerek. Bapker habarlasyp, jyl saıyn jasalatyn kelisimsharttyń uzartylmaıtynyn eskertti.
– Bas bapker ne dedi? Qalý týraly usynys bolmady ma?
– Bul týraly eshkimmen sóz talastyryp jatpadym. Al bapker, kerisinshe, meniń ketkenimdi jón kórgen tárizdi. Ol kisi «Eger jattyǵam deseń, óziń bilesiń, biraq saǵan aılyq tólenbeıdi», dedi. О́zge bapkerlerdiń de osy joldy durys dep tapqanyn jetkizdi. Jattyǵýlarda ózgelerge qarap júrgennen ne ózgeredi, ýaqyt joǵaltqanym bolmasa. Sondyqtan quramadan kettim.
– Al short-trekte qarjylandyrý tıisti deńgeıde boldy deı alasyz ba?
– Tıisti deńgeı degenniń ózi – salystyrmalyq uǵym. Olımpıadadan keıin sporttan ketip, bir jyldan soń oraldym. Sondyqtan keıbir jaǵdaılardan beıhabar bolýym múmkin. Biraq burynǵyǵa qaraǵanda jaqsardy deýge bolatyn shyǵar.
– Jetkiliksiz jattyǵý jasaý degendi qalaı túsinýge bolady? Sonda siz jattyǵýǵa komandalas áriptesterińizden qaraǵanda azyraq ýaqyt bólesiz be?
– О́zgelerden az ekenin jasyrmaımyn. Sebebi, meniń aǵzam berilgen tapsyrmalar júkteıtin aýyrtpalyqtarǵa tóze almaıdy. Sondyqtan óz múmkindigime qaraı jattyǵatynmyn.
– Siz Vankýver jáne Sochı olımpıadalarynyń qatysýshysyz. Al búgingi quramadaǵy eń tájirıbeli sportshyǵa qatysty bul sheshim qanshalyqty ádil dep sanaısyz?
– Aıaq asty aıtylǵan aqparat qoı. Biraq buǵan men ádil, ne ádiletsizdik dep baǵa bere almaımyn. «Jeke múdde joq, tek bıznes» deıtin tirkestegideı, eshkimdi aıyptamaımyn.
– Bizdiń elde short-trekshilerdi daıarlaıtyn bilikti mamandar az. Bálkim osy salada baǵyńyzdy synap kórý kerek pe edi...
– Mundaı usynys túsken joq. Bylaısha aıtqanda, meniń aldymda sporttan ketýden basqa amal qalmady. Eger meni bul salada qajet dep tappasa, ári qaraı damıtyn, ósetin sala, jalpy bolashaǵym týraly oılanýym kerek.
– Siz buǵan deıin de sporttan ketip, qaıta oraldyńyz. Ol kezderde ne sebep bolǵan edi?
– Ras, eki ret short-trekpen qosh aıtysqanmyn. Alǵashqysynda, 2011 jyly sharshaǵandyqtan, ári joǵary oqý ornyna túsip jatqandyqtan ketsem, ekinshisine koreılik bapkermen bolǵan kıkiljiń sebep. Ol meniń boıymda áleýettiń baryn kórdi de, aýyrtpalyqty údete tústi. Al meniń oǵan shamam jetpeıtin. Jattyǵý jasaýdan bas tartqanymda, ol kisi qol jumsady. Sonan soń men quqyq qorǵaý organdaryna shaǵymdandym. Muny estigen bapkerler meni komandadan shettetti. Koreılik maman qyzmetinen ketken soń, quramaǵa qaıta shaqyrdy. Men kelisimimdi berdim.
– Al sizdiń ketetinińizdi estigen ózge jigitter ne dedi?
– Olarmen bul týraly áli sóılesken joqpyz. Estigen de shyǵar, óıtkeni Gollandııada ótip jatqan oqý-jattyǵý jıyndaryna barǵan joqpyn ǵoı. Negizi qarym-qatynasymyz jaman emes edi. Buǵan deıingi Nıderlandyda ótken jattyǵý jıyndarynda bir bólmede turdyq. Degenmen olardan qoldaý kúttim dep te aıta almaımyn. Olar ne ózgerte alady?!
– Jospar dep qaldyńyz. Bolashaqqa qatysty qandaı maqsatyńyz bar?
– Qazir sol týraly oılap júrmin. Basqa salaǵa aýysýym da múmkin. Ekinshi mamandyqqa oqýǵa tússem be degen jospar da bar.
– Sportta jumyssyz qalamyn dep qorqasyz ba?
– Muny qorqynysh degennen góri tájirıbe degen durys shyǵar. Sol tájirıbe kórsetkendeı, bul sala turaqsyz bolyp shyqty. Bir-aq kúnde senimen qosh aıtysýy múmkin.
Suhbattasqan Mádına ASYLBEK
ASTANA
