Alǵashqy kúni «Qazaq tiliniń kreatıvti oqytýdyń úzdik tásilderi» degen taqyrypta joǵary oqý oryndarynyń oqytýshylary men kolledj, mektep muǵalimderi qazaq tildi emes toptarǵa shaǵyn sabaqtar berdi. Odan keıin esse jazdy. Osy sharanyń arasynda «Qazaq tili: búgini men bolashaǵy» degen taqyrypta ótken dóńgelek ústelde «USTAZ» ortalyǵynyń dırektory N.Imanǵalıev, Astana «USTUDY» ortalyǵynyń dırektory U.Qarmysov, Nazarbaev Ýnıversıtet qaýymdastyǵynyń professory S.Orazǵalıev Joǵarǵy quqyq mektebiniń dırektory S.Pen sekildi azamattar ult tiliniń kórkeıýi ult sanyna da, sapasyna da qatysty ekenin aıtyp, qazaqtyń kóbeıý máselesin qozǵady. Jastardyń ultty bekitý, tildi tereń bilý jónindegi pikirlerine belgili qalamgerler Q.Jıenbaı men Q.Ábil ún qosyp, aǵalyq tilekterimen qanattandyrdy.
Dóńgelek ústelden keıin oqý ornynyń birinshi kýrs stýdentteri qazaq tarıhynan alǵan bilimderin bekitý maqsatynda uıymdastyrǵan «Batalasý» atty sahnalyq qoıylymdy jıylǵan qaýym nazaryna usyndy. Onda Ordabasynda eldikti saqtaý maqsatynda serttesken, batalasqan qazaq jaqsylarynyń beınesi kórinis taýypty. Ásirese, «Aqtaban shubyryndyǵa» túsken qazaq halqynyń aýyr taǵdyry syn saǵatta qalǵanda Bógenbaı, Qabanbaı, Jánibek, Malaısary, Eset, Naýryzbaı, Baıan, Taılaq batyrlardyń birigip bilek bolyp, týǵan jerdi jaýdan bosatqany stýdentterdiń somdaýynda kelisti shyqty. Memlekettik tildi damytý qorynyń dırektory A.Sháýeev aıtqandaı, naǵyz otanshyldyq rýh osy degizdi.
Bir atap óterligi, stýdentterdiń mamandyqtary bólek bolǵanymen, ulttyq rýhy myqty eken. Batyrlardyń mártebesin arttyrýǵa talpynystary alǵa qoıǵan maqsattaryna jetkizdi. Olarǵa serik bolyp júrgen arý qyzdardyń aqyldy áreketi kimdi de bolsa oılandyrmaı qoımady.
Taǵy bir aıtarymyz, teorııalyq bilim men tájirıbeni ushtastyrýdy ýnıversıtet 2014 jyldan beri júrgize bastapty. Onyń basynda oqý ornynyń basshysy Talǵat Nárikbaevtyń turýy ulttyq sananyń jańǵyra bastaǵanyn kórsetse kerek. Stýdentter jyl boıy tarıh páninen alǵan teorııalyq bilimderin ata tarıhymyzdyń bastaýy bolǵan jerlerde bolyp, ondaǵy eskertkishtermen tanysýdy dástúrge aınaldyrǵan. Keıin, sonyń negizinde sahnalyq kórinister qoıý jarasym tapqan.
Aldaǵy eki sharadan keıin synǵa túsken oqytýshylardyń arasynan shyqqan úzdikterdi marapattaý rásimi ótti. «Mundaı sharalar aldaǵy ýaqytta jalǵasyn taba beredi», – deıdi bilim ordasyndaǵy qazaq tili men ádebıetin kreatıvti oqytý ortalyǵynyń dırektory Kúlásh Shaımerdenova.
Súleımen MÁMET,
«Egemen Qazaqstan»
