20 jylǵa sottalýy múmkin

Halyqaralyq valıýta qorynyń 62 jasar basshysy Domınık Stross-Kan qyz zorlamaq boldy degen aıyppen sot aldynda jaýap bermek. Ol 20 jylǵa bas bostandyǵynan aıyrylýy múmkin. Stross-Kannyń ózi bolsa, taǵylǵan aıyptardyń bárin teriske shyǵaryp otyr. Qalyptasqan jaǵdaıǵa qaramastan, birqalypty jumys istep jatqan Halyqaralyq valıýta qory óz basshysynyń áreketine qatysty eshqandaı túsinik bergen joq. Sóz retinde HVQ basshysynyń jeksenbige qaraǵan túni Parıjge ushatyn ushaqqa otyraıyn dep turǵan jerinde Nıý-Iork áýejaıynda tutqyndalǵanyn aıta ketý kerek. Oǵan qonaq úıde jumys isteıtin bir áıeldi zorlamaq boldy degen aıyp taǵylyp otyr. «Nakby» kúnindegi qasiret Evreı memleketiniń qurylǵan kúni jáne arabtardyń ulttyq qasiret kúni bolyp esepteletin «Nakby» kúni shekaradan ótpek bolǵan palestına­lyq­tarǵa qarsy ızraıldik soldattar oq atqan. Sonyń saldarynan keminde 13 adam qaza taýyp, 100-den astam adam túrli jaraqattar alǵan. Osy sebepten Palestına avtonomııasynda úsh kúndik qaraly kún jarııalandy. Al Izraıl memleketi bolsa, óz shekarasyn odan ári de qorǵaı beretinin málimdep otyr. Sonymen birge Tel-Avıvte 22 jasar arabtyń qalanyń basty kóshesinde turǵan birneshe avtokólikti kelip soǵýyna baılanysty bir ızraıldik qaza taýyp, 17 adam jaraqat alǵan kórinedi. Lıvııa bombalaýdy toqtatýdy suraıdy 15 mamyr kúni Lıvııa astanasy Trıpolıge BUU-nyń arnaýly elshisi Abdýl Ilah ál-Hatıb keldi, dep ha­barlady «Bostandyq» radıosy. Ol M.Kaddafı úkimetiniń syrtqy ister mınıstrimen jáne Lıvııa lıderine adaldyǵyn saqtap otyrǵan taıpalar basshylarymen kezdesken. Biraq oǵan M.Kaddafıdiń ózimen tikeleı júzdesýdiń sáti túspegen kórinedi. BUU elshisi oq atýdy toqtatyp, Lıvııa áskerleri qaramaǵyndaǵy qalalarǵa gýmanıtarlyq mıssııanyń ótýine jol ashýdy talap etken. Degenmen, Lıvııaǵa qarsy operasııaǵa qatysyp jatqan Ulybrıtanııa basshylyǵy eldiń ınfraqurylymdaryn bombalaýǵa ruqsat alý qajet degen pikir bildirip otyr. Saılaý aldyndaǵyna nasıhat dep baǵalady Iran prezıdenti Mahmýd Ahmadınejad «Ál-Kaıda» basshysy Ýsama ben Ladenniń qaza tapqan sátinde Amerı­kanyń tutqynynda bolǵandyǵy týraly málimdegen. Al onyń kózin joıý jónindegi operasııa Barak Obamanyń aldaǵy saılaýdaǵy je­ńisin qamtamasyz etýdi kózdegen nasıhattyq jumystyń bir bóligi ǵana. AQSh ben Ladendi terrorızmmen kúres maq­satynda emes, saılaý kezinde adamdardyń daýysyna ıe bolý úshin saılaýaldy naýqany sheńberinde óltirip otyr, dep atap kórsetken Iran prezıdenti Tehranda ótken terrorızmmen kúres jónindegi halyqaralyq konferensııaǵa qatysýshy­larmen kezdesken kezde. Dúnıe-múlik pen aqshadan bas tartpaq Egıpettiń eks-prezıdenti Hosnı Mýbarak pen onyń zaıyby Sıýzan Sabıt dúısenbi kúni memleket paıdasy úshin ózderiniń múlikteri men aqshalaı qarjylarynan bas tartý prosedýrasyn bastady, dep habarlady RIA-Novostı agenttigi. Egıpettiń burynǵy basshysy 143 mıllıon dollar qarjysy bar esep-shotty memleket paıdasyna aý­darýǵa daıyn ekenin málimdegen. Mýbaraktyń aı­týynsha, bul esep-shot Aleksandrııa kitap­hana­synyń muqtajdaryna arnalǵan kórinedi, biraq aqsha joǵa­lyp ketedi degen qaýip­pen eks-prezıdent ol jóninde kitaphana basshylyǵyna habar bermegen. Al Sıýzanna Sabıt bolsa, Kaır qalasynyń shetindegi 741 myń dollar turatyn vıllasyn memleketke berý jóninde qujattar daıyndaý týraly óz advokatyna tapsyrma bergen kórinedi. Soltústik Kavkaz múftıleri bas qosty Bakýde Kavkaz halyqtary joǵary dinı keńesiniń esep berý májilisi ótpek. Oǵan Soltústik Kavkaz respýb­lıkala­­ryndaǵy dinı basqarmalardyń barlyq basshylary qatysady dep kútilýde. Má­jiliste Kavkaz musyl­mandary basqar­masynyń basshysy sheıh-ýl-ıslam Allahshýkıýr Pashazade tóraǵalyq etpek. Kavkaz halyqtarynyń joǵary dinı keńesi Pashazadeniń tór­aǵalyǵymen 1992 jyly qu­rylǵan bolatyn. Osy jolǵy májilis Kavkaz musyl­mandary basqarmasynyń Baký ákim­shilik ǵımaratynda ótetin bolady. Lıgaǵa jańa basshy saılandy Arab memleketteri Egıpettiń syrtqy ister mınıstri Nabıl ál-Arabıdi Arab memleketteri lıga­synyń basshysy etip saılady, dep habarlady Reıter agenttigi. Arab memleketteri lıgasyna múshe elderdiń syrtqy ister mınıstrleri ál-Arabıge biraýyzdan daýys bergen. Konsýltasııalar barysynda Katar memleketiniń ókili ál-Arabıge básekeles bolyp, degenmen, keıin ol óz kan­dıdatýrasyn qaıtyp alǵan kórinedi. Sóz retinde Arab memleketteri lıgasyna Afrıka men Azııanyń arab tildi 22 memleketiniń kiretinin aıta ketý qajet. Olardyń ishinde Egıpet, Sırııa, Lıvııa jáne Irak sııaqty birqatar derjavalar da bar. Internet materıaldary negizinde ázirlendi.