Eki kúnge sozylǵan festıval joǵary deńgeıde uıymdastyrylyp, oblys tarıhyndaǵy aıtýly sporttyq oqıǵalardyń birine aınaldy. Festıval aıasynda ulttyq, ekstremaldyq jáne dástúrli qysqy sport túrleri barynsha qamtyldy. Atap aıtqanda, tazy jarysy, jamby atý, avtodrıft, erler men áıelder arasyndaǵy shańǵy jarysy, balalarǵa arnalǵan syrǵanaý, konkı tebý, kerlıng, qysqy basketbol jáne ózge de sport túrleri kópshilik nazaryna usynyldy. Sonyń ishinde Oral óńirinde buryn-sońdy uıymdastyrylmaǵan tyń baǵyt – shańǵymen jamby atý saıysy da qyzyqty ótti.
Festıval aıasynda qusbegilikten eresekter arasyndaǵy Qazaqstan Respýblıkasynyń XIX chempıonaty ótti. Oǵan elimizdiń barlyq óńirinen kelgen 70-ke jýyq saıypqyran qatysty. Iteligi men búrkit, qyran men qarshyǵa baptaǵan qusbegiler osy festıvaldiń kórkine aınaldy. Aqjaıyq tórinde ulttyq saıat óneriniń týy jelbiredi.
Chempıonattyń ashylý saltanatyna qusbegilik federasııasynyń vıse-prezıdenti, osy salaǵa 30 jylǵa jýyq ǵumyryn arnaǵan etnograf Baǵdat Múptekeqyzy, qusbegilikten aǵa jattyqtyrýshy, federasııanyń atqarýshy dırektory Bazarbek Kúntýǵan syndy mamandar arnaıy keldi. Meımandarǵa Batys Qazaqstan oblysy dene shynyqtyrý jáne sport basqarmasynyń basshysy Baqdáýlet Sábıtov laıyqty qurmet kórsetti.
Alǵashqy kúni festıvalge 1000-ǵa jýyq qatysýshy tirkelse, ekinshi kúni bul kórsetkish 4000-nan asyp ketti. Búldirshin baladan aqsaqal qarııaǵa deıin kelip, sport alańyna shyǵyp, qysqy dýmannyń qyzyǵyna bólendi. Aıryqsha atap óterligi, festıval aıasyndaǵy barlyq sport túrleri qala turǵyndary úshin tegin uıymdastyryldy. Bul – buqaralyq sportty damytýǵa, salaýatty ómir saltyn nasıhattaýǵa baǵyttalǵan ıgi bastama boldy.
Sonymen, festıval aıasynda ótken kerlıng saıysynan Gúljanat Tólegen men Arman Kenshelekov júldeger atandy. Tazylar saıysynda Eldar Begalıevtiń «Kókjaly» - 1 oryn alsa, Jomart Ǵapparovtyń «Aıqasy» - ekinshi, Aıbolat Tólegenovtiń «Syrttany» - úshinshi orynǵa laıyq dep tanyldy. Dástúrli sadaq atýdan Ásemgúl Ǵalymjanova men Rýstam Amanǵalıev úzdik mergen atandy. Jamby atý saıysynan Arman Jýlkalıevtiń jebesi nysanany julyp tústi. Shańǵy jarysynda 8 jastaǵy Qazbolat Ermanov «Eń jas qatysýshy» atansa, Beket Qurmanǵazy «Eń úzdik tehnıka» ıesi atandy.
«Oral Winter Fest – 2026» – ulttyq dástúr men zamanaýı sportty ushtastyrǵan, qysqy sport mádenıetin jańa beleske kótergen taǵylymdy shara retinde el jadynda qalary sózsiz. Bul festıval – birlik pen belsendiliktiń, sergektik pen serpinniń sımvolyna aınaldy. Ári óńirde qysqy sport túrlerin damytýǵa serpin berip, jas sportshylardyń sheberligin shyńdaýǵa úlken múmkindik ashty», deıdi Batys Qazaqstan oblysy dene shynyqtyrý jáne sport basqarmasynyń basshysy Baqdáýlet Sábıtov.
