Depýtat Ashat Aımaǵambetovtiń aıtýynsha, qazirgi tańda ár mektep smartfondardy paıdalaný tártibin ózi anyqtaıdy. Sol sebepti depýtattar barlyq oqý oryndary úshin ortaq ereje engizýdi jáne mobıldi qurylǵylardy qoldaný jónindegi sheshimdi Oqý-aǵartý mınıstrligine berýdi usyndy.
«Mektepterde biryńǵaı ereje joq. Bul tájirıbe kóptegen mektep dırektorlarynyń ata-analarmen pikirtalas pen shaǵymdardan qorqyp, sheshim qabyldaýdan qashýyna ákeledi. Sonyń saldarynan bir mektepte telefonǵa tyıym salynsa, ekinshisinde ruqsat etiledi. Biz bul ókilettikti Oqý-aǵartý mınıstrligine berýdi usynamyz. Mınıstrlik barlyq mektepterge ortaq, túsinikti saıasatty anyqtaıdy», dedi depýtat Ashat Aımaǵambetov.
Sonymen qatar, zań jobasynda:
- muǵalimderdiń oqýshylarǵa tek oqý prosesi kezinde ǵana jaýapty bolýy;
- pedagogterdiń bir mezette qaǵaz jáne elektrondy esepti qatar júrgizbeýi;
- ata-analardyń bala ómiri, densaýlyǵy jáne qaýipsizdigi úshin jaýapkershiligin keńeıtý qarastyrylǵan.
Bilim berý jáne pedagog mártebesi týraly zań jobasy qazir birinshi oqylymda qaralyp jatyr. Alda Májilistiń ekinshi oqylymy, Senattyń qaraýy jáne Prezıdenttiń qol qoıýy kútiledi.
