Foto: Aqorda
Memleket basshysy Kenııa Qazaqstannyń Afrıka qurlyǵyndaǵy mańyzdy ári senimdi seriktesteriniń biri ekenin atap ótti.
«Kenııa – Afrıkanyń qarqyndy damyp kele jatqan jáne ozyq elderiniń biri. Geografııalyq turǵydan elderimiz alshaq ornalassa da, bizdi jańǵyrýǵa degen umtylys pen bolashaqqa senimdi kózqaras biriktiredi. Qazaqstan Eýrazııa júreginde oryn tepken, al Kenııa Shyǵys Afrıkanyń ekonomıkalyq ortalyǵy sanalady. Bul ekijaqty seriktestikti keńeıtý turǵysynan aıryqsha mánge ıe. Biz naryqtardy jáne kólik baǵdarlaryn baılanystyryp, ınvestısııalar men tyń múmkindikterge jol ashý arqyly Ortalyq Azııa men Afrıka arasyna dáneker bola alamyz. Jańa ǵana ekijaqty qarym-qatynastyń negizgi baǵyttaryn talqylap, halyqaralyq kún tártibi jóninde pikir almastyq. Elderimizdiń jahandyq máselelerge qatysty ustanymdary uqsas. Biz beıbit syrtqy saıasat júrgizip, mýltılateralızm qaǵıdatyna saı álemdik tártipti dáıekti túrde jaqtap kelemiz. Qazaqstan tarapy ortaq maqsattardy ózara tıimdi ári naqty jobalarǵa ulastyrýǵa daıyn. Búgingi sapar barysynda qol jetkizilgen kelisimder Qazaqstan men Kenııa yntymaqtastyǵyn jańa jáne sapaly deńgeıge kóteretinine senimdimin», dedi Qasym-Jomart Toqaev.
Prezıdent ózara saýda men ınvestısııa múmkindikterin keńeıtý úshin Iskerlik keńes qurýdy usyndy.
Ýılıam Rýto Qasym-Jomart Toqaevpen 2023 jyly Nıý-Iork qalasynda ótken BUU Bas Assambleıasynyń sessııasy aıasynda kezdeskenin atap ótti.
Ol osy júzdesý eki eldiń arasynda 1993 jyly qalanǵan qarym-qatynasty odan ári nyǵaıtýǵa negiz bolǵanyn jetkizdi.
«Prezıdent myrza, Naırobı qalasynda turaqty elshi taǵaıyndaý týraly sheshimińiz Sizdiń jáne Úkimetińizdiń Qazaqstan men Kenııa arasyndaǵy baılanystardy ilgeriletýge mańyz berip otyrǵandaryńyzdy baıqatady. Meniń saparym – elderimizdiń yntymaqtastyǵyn nyǵaıtýdy kózdeıtin naqty qadam. Oǵan esh kúmán joq. О́zara saýda-sattyqty arttyrý baǵytynda aıtarlyqtaı áleýetimiz bar dep oılaımyn», dedi Kenııa Prezıdenti.
Taraptar saýda-sattyq, aýyl sharýashylyǵy, kólik-logıstıka, taý-ken óndirisi, jańartylatyn energııa kózderi, aqparattyq tehnologııalar, elektrondyq úkimet, ǵarysh, qarjy jáne týrızm sekildi salalarda seriktestikti nyǵaıtý perspektıvasyn talqylady.
Táýelsizdik saraıynda Kenııa Prezıdentin resmı qarsy alý rásimi ótti
Memleketter basshylary mádenı-gýmanıtarlyq baǵytta joǵary oqý oryndarynyń arasynda tyǵyz baılanysty jolǵa qoıýǵa, týrızm bastamalaryn ózara qoldaýǵa jáne bıoalýantúrlilikti saqtaý isinde tájirıbe almasýǵa múmkindik mol ekenin atap ótti.
Buǵan deıin Memleket basshysy Kenııa Prezıdentimen shaǵyn quramda kelissóz júrgizdi.
