Turar aýylyndaǵy qýanysh

T.Rysqulov atyndaǵy №16 orta mektepte qazaqtyń birtýar arysyna arnalǵan mýzeı ashyldy Almaty irgesindegi Talǵarda Baýyrjan Momyshulynyń dańqqa bólengen batyrlyq joly bas­tal­ǵan, asa kórnekti memleket qaı­rat­keri Turar Rysqulovtyń kindik qany tamǵan. Buryn jaı ǵana «Brıgada» atalyp júrgen Alataý bókterindegi arystyń aýylyna kezinde Asanbaı Asqarov Turar Rysqulov atyn bergizip, osy attas kolhoz qurǵyzǵan kórinedi. Jaq­synyń sol sharapatynyń septik-sebebimen keıin aýyldaǵy mektep te jerles asyldyń atyn ıemdene, ultjandy azamattardyń uıytqy bolýymen Talǵar qalasyndaǵy eń uzyn kóshege elim dep eńirep ótken erdiń esimi berilgen-di. Endi, mine, óz atyndaǵy mektepte zamana talabyna saı talǵammen jasaqtalǵan Turar mýzeıi saltanatpen ashylyp jatyr. Bul mýzeıdiń negizi osydan shırek ǵasyrdaı buryn qalanyp, áýeli shaǵyn burysh bolyp ashylǵan eken. Mekteptiń sol kezderdegi dırektorlary Sánııa Turlıeva, Hanym Soltanqulovalardyń bas­shy­lyǵymen birtalaı alǵashqy izdenis jumystary jasalyp, Rys­qulov urpaqtarymen baılanys ornatylyp, kóptegen jádigerler, qujattar sol kezderde jınaq­talǵan. Bul ıgi iske óz yqylas­tarymen muǵalim Dúıseke Raqym­januly, kitaphanashy Gúljan Ah­metova qulshyna atsalys­qan. Kóptegen qundy materıaldarmen, jańa jádigerlermen tolyq­tyrylǵan, kirse shyqqysyz etip bezendirilgen úlken bólme­degi kóz jaýyn alar kórkem mýzeıdiń lentasyn Alataý aýyldyq okrýgi­niń ákimi Serik Izımov qıdy. Aýyl aqsaqaly Nurahmet ata men aýyl ımamy Káribaı Qarabaev aq bataly ımanı tilekterin qosty. Sońǵy bes jyl boıy mýzeıdi órkenıet ólshemine saı jasaqtaý oraıyndaǵy jumystardy asqan tyńǵylyqtylyqpen izerlegen Rysjan Bekbosynova alǵashqy tanystyrý rásimin jasady. Jańa mýzeı alty bólimnen turady. Munda Turar Rysqulovtyń ómir joly hám qaıratkerlik qyzmeti, sondaı-aq shyǵarmashylyq mura­sy keńinen qamtylypty. Máde­nıettanýshy Moldııar Serikbaev, Abaı atyndaǵy QazUPÝ-dyń Qazaqstan tarıhy kafedrasynyń meńgerýshisi, tarıh ǵylym­dary­nyń kandıdaty Taldybek Nur­peıisov, rysqulovtanýshy ǵalym Ordaly Qońyratbaev mektep mýzeıine joǵary baǵa berdi. Osy arada Ordalynyń Rysqulov eń­bek­teriniń 20 tomdyǵyn daıyn­dap jatqanyn, kınoger Erkin Raqyshevtiń ardagerimiz týraly derekti fılm túsirip júrgenin estip jáne qýanyp qaldyq. «Túrki tektes túgel bol!» dep ósıet aıtqan tuǵyry bıik Turar mýzeıiniń ashylý saltana­ty­na oraı mektep oqýshylary sha­ǵyn konserttik qoıylym ázir­lep­ti. Sahnalyq kórinister sonaý stalındik qýǵyn-súrgin jyl­daryn, sol qıyndyqta qaıys­paǵan qaı­sar rýhty elestetkendeı boldy. Arýaqty bir aýnatqan Turar týraly tolǵaý, 85-tegi abyz aqyn Ádibaı Tabyldıevtiń «Er Tu­rardyń elimen qoshtasýy», mektep muǵalimi Úmit Ábdikerim­qyzy jazǵan Turar týraly án oryn­dalyp, ulylyq ulaǵaty aıǵaq­taldy. Osynaý ıgi istiń negizgi uıym­dastyrýshysy mektep dı­rektory, aýdandyq máslıhat de­pýtaty Matan Bekbosynov ekendigin aıta ketý oryndy bolmaq. Bıyl onyń basta­ma­symen Uly Otan soǵy­syna qa­tysýshy­lar­dyń esimderi túgel oıylyp jazylǵan mármár eskertkish turǵyzylyp edi. Dı­rek­tordyń endigi armany – mektep aldyna Rysqulovtyń eskertkish músinin ornatý. Qorǵanbek AMANJOL.