Belarýs prezıdenti dáris oqydy

Keshe Lev Gýmılev atyndaǵy Eýrazııa ulttyq ýnıversıtetine Belarýs Prezıdenti Aleksandr Lýkashenko arnaıy atbasyn buryp, atalǵan joǵary oqý ornynyń professorlyq-oqytýshylar quramymen jáne stýdentterimen kezdesip, jınalǵan qaýym alynda dáris oqydy. Kezdesýdi ashqan ýnıversıtet rektory Baqytjan Ábdiraıym aldymen Belarýs Prezıdenti, L.N.Gýmılev atyndaǵy Eýrazııa ulttyq ýnıversıtetiniń Qurmetti professory Aleksandr Lýkashen­ko­ǵa negizi qalanǵanyna 15 jyl tolatyn Qazaqstandaǵy jetekshi joǵary oqý ornyna arnaıy kelgeni úshin alǵysyn jetkizdi. «Siz­diń oqý ornymyzǵa arnaıy kel­genińiz – biz úshin aıryqsha qur­met. Osy oraıda sizdi jaqynda ótken saılaýdaǵy jeńisińizben quttyq­taı­myz. Bul halyqtyń ózi­ńizge degen seniminiń belgisi, sondaı-aq elińizdi ilgeri jyl­jy­tý baǵy­tynda atqaryp jatqan qyz­­metińizdiń durystyǵynyń dá­leli dep oılaımyz», – dedi rektor óz sózinde. Osylaı deı kele, B.Ábdi­ra­ı­ym Belarýs memleketiniń damý jolyna, ózge eldermen, onyń ishinde Qazaqstanmen aradaǵy dıp­lomatııalyq baılanysynyń jyl ótken saıyn jandanyp kele jatqanyna toqtalyp ótti. «Bú­ginde gýmanıtarlyq baǵyttaǵy yn­tymaqtastyǵymyz da joǵary deń­geıde damyp keledi. L.N.Gý­mı­lev atyndaǵy Eýrazııa ulttyq ýnı­versıteti Belarýs memleke­ti­niń kóptegen joǵary oqý oryn­darymen, ǵylymı-zertteý mekemelerimen, Ǵylym akademııa­sy­men jaqsy áriptestik qarym-qa­ty­nas ornatqan. Bul eki el pre­zıdentteriniń júrgizip otyrǵan saıasatynyń jemisi», – dedi B.Áb­diraıym bul týrasynda. Budan keıingi kezekte ol jo­ǵa­ry oqý ornyna kelgen qurmetti qonaq, Belarýs Prezıdenti Alek­sandr Lýkashenkoǵa sóz berdi. «Qurmetti dostar, sizdermen birge osynaý bilim ordasynda kez­desip otyrǵanyma qýanysh­ty­myn. Bul men úshin de úlken qurmet», – dep sózin bastaǵan ol óziniń darqan minezdi qazaq jerine dos peıildi Belarýs elinen kelip otyrǵanyn aıtyp, pro­fes­sor­lyq-oqytýshylar quramy men stýdentterdi joǵary oqý orny­nyń 15 jyldyq mereıtoıymen quttyqtady. «Osy bir az ǵana jyl­dar ishinde sizderdiń ýnıver­sı­tetterińiz shyn mánisinde Qa­zaqstannyń bedeldi ǵylym men bilim ordasyna aınalyp úlgerdi. Búginde bul oqý orny elge qajetti kásibı mamandardy daıarlaý men Qazaqstannyń ǵylymı áleýetin kóterýge aıryqsha úles qosyp keledi», – dedi Belarýs Pre­zıdenti. Sondaı-aq, ol elor­dadaǵy jetekshi ýnıversıtet pen Belarýs memleketindegi joǵary oqý oryndary arasynda joǵary deńgeıde áriptestik qarym-qa­ty­nas ornatý baǵytynda úlken bastamalar kóterilgenin, ǵylymı-tehnıkalyq yntymaqtastyqty kóz­deıtin qazaqstandyq-bela­rýs­tik ortalyqtyń da aýqymdy jumystar atqaryp jatqanyn tilge tıek etti. «Bulardyń bar­lyǵy eki el áriptestiginiń tek eko­no­mı­ka­lyq turǵyda ǵana emes, gýma­nıtarlyq baǵytta da óris­tegenin baıqatady», – dedi A. Lýkashenko. Ýnıversıtet qabyrǵasynda ót­ken dáris barysynda A. Lýkashenko sondaı-aq Belarýs eliniń tarıhyna, júrip ótken jolyna, túrli kezeńderde baǵyndyrǵan asý-belesterine kóz júgirtip, el­diń qazirgi damý qarqynyna, qos memleket arasyndaǵy ynty­maq­tastyq aýanyna qatysty da óz oı-paıymyn jetkizdi. Sol ar­qy­ly, ol jınalǵandarǵa, ásirese, stý­dentterge Belarýstiń ózgege uqsamaıtyn ereksheligi men ar­tyqshylyǵy jóninde jan-jaqty málimet berdi. Onyń ishinde Qa­zaq­stan men Belarýstiń gýmanı­tar­lyq, bilim-ǵylym salasyn­da­ǵy baılanysyn jandandyrý úshin oqý oryndary arasyndaǵy tájirıbe almasýlarǵa aıryqsha mán berilý qajettigin de atap ótti. Ár memleket mamandy birinshi kezekte, ózi úshin daıyndaıdy. О́z eline laıyqty bilim júıesin damytady. Sol úshin memlekettik bıýdjetten qarjy bólinedi. Al ár jas kásibı maman bolý jolynda talmaı eńbektenýi, izdenýi kerek. Sondyqtan eń aldymen, qoǵamǵa qajetti maman bolyńyzdar degim keledi», – dedi sóziniń qorytyn­dysynda A. Lýkashenko. Budan keıin stýdentter qur­met­ti qonaqqa ózderin qyzyqtyr­ǵan birqatar saýaldaryn qoıdy. Kezdesý sońynda ýnıversıtet rektory B.Ábdiraıym joǵary oqý ornyna kelip, oqytýshylar men stýdentter aldynda dáris oqyǵany úshin joǵary oqý orny atynan Aleksandr Lýkashenkoǵa taǵy da alǵysyn jetkizip, oǵan «Eýrazııa maqtanyshy» estelik medalin tabys etti. Láıla EDILQYZY.