Qaýipsizdik keńesiniń kezekti otyrysy

Keshe Aqordada Memleket basshysy Nursultan Nazar­baev­tyń tóraǵalyǵymen Qazaqstan Respýblıkasy Qaýipsizdik Keńesiniń kezekti otyrysy ótti, dep habarlady Qazaqstan Respýblıkasy Prezıdentiniń baspasóz qyzmeti. Otyrysta elimizdiń aqparat­tyq qaýipsizdigin qamtamasyz etý men qylmystyq-atqarý júıesin damytý máseleleri qaraldy. Memleket basshysy aqparat­tyq-kommýnıkasııalyq tehnolo­gııa­ny damytý jáne keńinen engizý qoǵam men memleket úshin ja­ǵymdy múmkindikter berip, úlken úles qosatynyn atap ótti. Elimizde elektrondy qyzmet, «elektrondy úkimet», keń jol­aq­ty ınternet, baılanystyń sońǵy býyny, sandyq jáne spýtnıktik televıdenıe belsendi engizilýde. Sonymen qatar, bul resýrstar qoǵamdyq qaýipsizdik maqsatyna sáıkes kelmeıtin qylmystyq jáne ózge maqsatta paı­da­la­ny­latynyn eskermeýge bolmaıdy, sondyqtan memleket tıisti ret­teý­shi sharalardy ázirleýi qajet. Atalǵan másele boıynsha baıandama jasaǵan Prezıdenttiń kómek­shisi – Qaýipsizdik Keńesiniń hat­shy­sy Marat Tájın qazaq­standyq qoǵam men memlekettiń aqparattyq qaýip­sizdigin qamta­ma­syz etýdiń normatıvtik, ınstı­týttyq, ǵylymı, re­sýrs­tyq jáne ózge de qyrlaryna jan-jaqty toqtalyp ótti. Sondaı-aq jekelegen memlekettik organdardyń jetekshileri­niń ulttyq qaýipsizdiktiń osy mańyzdy salasyn quraıtyn el Prezıdentiniń aktileri men tap­syr­malarynyń oryndalý barysy týraly aqparattary tyńdaldy. Otyrys barysynda otandyq aqparattyq keńistiktiń básekege qabilettiligin, elimizde sandyq jáne spýtnıktik telehabar tara­tý­dy engizýdi, «elektrondy úki­met­tiń» senimdi qyzmeti men olar­dyń turǵyndarǵa qyzmet kór­setýin, aqparattyq júıe men resýrstardy tıimdi qorǵaýdy qam­tamasyz etýdiń ózekti máse­le­leri talqylandy. Budan basqa, aqparattyq sa­la­nyń qaýipsizdigin qamtamasyz ete­tin tıisti memlekettik mehanızmderge baǵa berildi, áleýetti qaý­ip-qaterler men táýekelder qaraldy. Memleket basshysy óz sózinde or­yn alyp otyrǵan problema­lar­ǵa nazar aýdarta otyryp, olardy jal­py mem­lekettik deńgeıde she­shý­diń jol­da­­ryn usynyp, elimizdiń aqpa­rat­tyq qaýipsizdi­gin qamtamasyz etetin stra­te­­­gııa­lyq baǵyttardy aı­qyn­dap berdi. Talqylaýdyń qorytyndysy boı­ynsha Úkimetke aqparattyq qaýipsizdik mehanızmderiniń jaı-kúıine tekseris júrgizý, memlekettik jáne korporatıvtik aqpa­rat­tyq júıeniń turaqty qyzmet etýin qamtamasyz etý, kıberqyl­myspen kúres tájirbıesine taldaý jasaý boıynsha birqatar tap­syrmalar berildi. Aqparattyq salanyń joǵary ǵylymı aýqymdylyǵyn eskere kele, ýákiletti memlekettik or­gan­dardyń aldyna aqparattyq qaýipsizdik salasynda ǵylymı-tá­jirıbelik qyzmetti damytý jáne kadrlar daıarlaý jóninde mindetter qoıyldy. Qazaqstan Respýblıkasynda­ǵy qylmystyq-atqarý júıesin da­mytý týraly máseleni qaraý kezinde Memleket basshysy bizge bul salada belgili bir nátıje­lerge qol jetkizý múmkin bolǵanyn atap ótti. Bas erkinen aıyrýǵa sottal­ǵan adamdar sanyn edáýir qys­qar­­týǵa múmkindik beretin izgilendirý týraly zańǵa qol qoıyl­dy. Elimizdiń Táýelsizdiginiń 20 jyldyǵy qurmetine raqym­shy­lyq jasaýdyń josparlanýy da óziniń oń rólin atqarady. Sonymen birge, elimizde uzaq merzimge sottalǵandar sany jo­ǵa­ry bolyp otyr, al jazany oryn­daý júıesi túbegeıli ózge­ris­ke ushyraǵan joq. Osyǵan baı­lanysty memleket tıisti retteýshi sharalardy ázirleýi qajet. Qylmystyq-atqarýshy júıeni damytýdyń negizgi baǵyttary týraly Ádilet mınıstri Rashıd Túsipbekov baıandama jasady. Sondaı-aq jekelegen memlekettik organdardyń jetekshileri­niń aqparattary tyńdaldy. Otyrys barysynda «túrme turǵyndarynyń» sanyn tómende­tý, jazasyn ótep júrgenderdiń jaǵdaıyn jaqsartý, sotty bol­ǵandardyń quqyqtary men olar­dyń eńbekpen, medısınalyq qyz­met­pen qamtylýyn  qamtamasyz etý, túrme qaýipsizdigi júıesin jań­ǵyrtý máseleleri talqylandy. Budan basqa, jazany óteý júı­e­siniń qyzmetin qamtamasyz etetin tıisti memlekettik mehanızmderge baǵa berildi, áleýetti qaýip-qater men táýekelder qaraldy. Memleket basshysy óz sózinde bostandyqtan aıyrýǵa balamany qoldaný úshin jaǵdaıdy keńeı­tý­de penıtensıarlyq júıeni odan ári damytý, jazany óteý jaǵdaıy men rejiminiń sanyn zańdyq turǵyda azaıtý, sottalǵandardy kamerada ustaýǵa birtindep aýysý, bas bostandyǵynan aıyrylǵan­dar ornyn jalpyǵa ortaq halyq­ara­lyq standarttarǵa sáıkesten­dirý úshin negizgi baǵyttardy anyqtap berdi. Talqylaýdyń qorytyndysy boı­ynsha Úkimetke qylmystyq zań­namany odan ári izgilendirý, baıqap kórý qyzmetin qurý, penı­tensıarlyq mekemelerde ustaý rejimderin ózgertý, sondaı-aq ja­zasyn ótep júrgender jaǵdaı­yn jaqsartýǵa baǵyttalǵan is-sha­ralardy qarjylandyrý jó­nin­de birqatar tapsyrmalar berildi. Otyrysta berilgen tapsyrma­lardyń oryndalýyna baqylaý jasaýdy Memleket basshysy Qaýip­sizdik Keńesiniń Hatshyly­ǵyna júktedi.