Qalamgerler basqosýy

Keshe Astanada Qazaqstan Jazýshylar odaǵy fılıalynyń jınalysy bolyp ótti. Ony  odaq basqarmasynyń tóraǵasy Nurlan Orazalın ashyp, júrgizip otyrdy. Ol bul basqosýǵa bas­qarma músheleri men elordadaǵy 102 jazýshynyń deni qa­ty­syp otyrǵanyn málim etti. Kún tártibine qoıylǵan másele bireý – astanalyq qalamgerlerdiń jańa basshysyn saılaý boldy. Jınalǵan qaýym aldynda osyǵan deıin Astana fılıalyn baıypty da baısaldy basqaryp kelgen kórnekti qalamger, Memlekettik syılyqtyń laýreaty Ákim Tarazı óz ótinishi boıynsha ornynan bosanatynyn málimdedi. Bul usynys qup alyndy. Aǵa býyn ókiline tabysty jumysy úshin Jazýshylar odaǵy basqar­ma­synyń atynan alǵys aı­ty­lyp, ıyǵyna shapan jabyldy. Son­­daı-aq Astana qalasynyń ákimi Imanǵalı Tasma­ǵam­be­tov­tiń Ákim aǵasyna degen il­tıpaty men syı-sııapatyn elor­dadaǵy tilderdi damytý basqar­masynyń basty­ǵy Orazkúl Asanǵazy tabys etti. Shyǵyp sóılegen jazýshylar Tólen Ábdik, Kákimbek Salyq, Serik Turǵynbek, Sultan Orazalın, Saýytbek Abdrahmanov, Bolat Bodaýbaev astanalyq fılıal­dyń burynǵy jetekshisine qalt­qy­syz qyzmeti úshin rızashy­ly­ǵyn bildirip, keletin jańa bas­shy­lyqqa jumysty  odan  ári jandandyra túsýdiń joldaryn usy­nyp, oı-pikirlerin aıtty. She­shimin kútip turǵan máseleler barshylyq eken. Sonyń biregeıi áli kúnge deıin fılıaldyń túp­kilikti oryn tepken óz meken-jaıy joq. Bir qýanarlyǵy – qala ákimi bul turǵysynda kómek qo­lyn sozýǵa ázir ekenin sezdiripti. Sonymen birge jalpy odaq ju­mysyn jetildire túsý jóninde de keń pikir almasyldy. Odaqqa qaraıtyn 14 oblystyq qurylym­ǵa bólimshe, al Astanadaǵyǵa fılıal mártebesin zańdastyrý qa­jettigi, sonda basqarý jaǵy qo­laıly ári tıimdi bola túsetini jóninde de pikir bildirildi. Bul usynys keleshekte qoldaýǵa tu­rarlyq dep maquldandy. Astana fılıalynyń jańa bas­shysy úmitkerine  daryndy aqyn, elordadaǵy S.Seıfýllın atyn­daǵy murajaıdyń dırek­to­ry Nesipbek Aıtuly usynylyp, ol biraýyzdan saılandy. Joǵarydaǵy shyǵyp sóılegen sheshender men odan keıin sóz al­ǵan qalamgerler N.Aıtulynyń iskerligin, adamdarmen til taby­syp jumys isteı alatynyn, bul qyz­metke úlken ómirlik táji­rı­bemen kelgenin úlgi etip aıtyp, onyń aldaǵy ýaqytta astanalyq qalam­gerlerdi maqsatty isterge ju­myl­dyra alatynyna zor úmit artty. Qoryta aıtqanda, el táýel­sizdiginiń 20 jylynda Qazaqstan Jazýshylar odaǵy tolymdy tabys­tarǵa jetkeni belgili. Endi onyń irgeli tiregi bolyp esepteletin  As­tana fılıalynyń jańa bas­shy­lyǵy qol jetken osyndaı ortaq ıgilikti odan ári baıandy etý úshin kúsh-jigerin aıamaıty­nyna Nesipbek Aıtuly sendire sóıledi. Qaısar ÁLIM. Astana.