Talant tanylmaı qalmaıdy

Keshe Beıbitshilik jáne kelisim saraıynda jas oryn­daýshylardyń respýblıkalyq HH «Jas qanat» baıqaýy merekelik ráýishte ashyldy. Astana qalasynyń ákimdigi, «Habar» agenttigi men halyqaralyq «Azııa daýysy» festıvaliniń uıym­das­tyrýymen 20-shy ret ótip otyrǵan bıylǵy báıgeniń basqa jyldarǵy saıystardan jóni bólek bolatyn sebebi, ol – el Táýelsizdigimen túıdeı qurdas, birge ósip, birge órken jaıyp kele jatqan mádenı shara. О́nerdiń neshe túrli joba­lary týraly qulaǵymyz shalyp qalǵanda, burynǵy TMD aýmaǵy boıynsha mundaı sharalardan Qazaqstannyń baǵy shaýyp tur­ǵanyna ishteı qýanamyz. Ol az deseńiz, halyqaralyq báıge­ler­de qazaqtyń jas oryn­daý­shy­lary sońǵy jyldary keremet óner kórsetip, Qazaq eliniń atyn aıdaı álemge tanytyp júrge­ni­ne janymyz odan saıyn mar­qaıa­dy. El sahnasy jyldan-jylǵa jas talanttarmen, tamasha óner­pazdarmen tolyǵyp, estradalyq oryndaýshylardyń mektebi osy kúnge deıin ónerdiń nebir aıtý­ly ókilderin tárbıelep shyǵar­dy. Olardyń arasynda búginde attary erekshe atalyp júrgen Medeý Arynbaev, Erlan Kókeev, Maıra Dáýletbaq sııaqty kóp­te­gen sańlaq ánshiler bar. Baı­qaý­ǵa baılanysty olardan bıylǵy jarystyń erekshelikteri týraly aıtyp berýin ótingen edik. Áńgi­meni aldymen, osy saıystyń bir jyldarǵy jeńimpazy Medeý Arynbaev bastady.  – «Jas qanat» baıqaýy men úshin ushqan uıam sekildi qashanda janyma ystyq bolyp qala beredi. Sebebi, ol meniń alǵashqy shyq­­qan sahnam, móldir sýynan dám tatqan tushy qudyǵym. Bireý­ler jeńil-jelpi, jaı dańǵyra, bos shýyl dep, ol týraly onsha jaq­sy pikir tarata bermeıdi. Olaı oılaıtyndar qatty qate­lesedi. Shynyn aıtqanda, munda álemdik klassıkalyq mýzykanyń naǵyz shuraıly nusqalary shyr­qa­lady. Jıyrma jyl degeniń adam ómirimen ólshengende, árıne, sonshalyq kóp te emes shyǵar, al endi óner joly retinde osy ke­zeń­derge kóz tastaıtyn bolsaq, qyrýar jumys tyndyrylǵany kó­ri­nedi, órimdeı jastardyń ara­sy­nan tutas bir býyn ósip shyq­qa­nyn baıqaımyz. Jyldaǵy jarys­tyń qazylar alqasy quramynda bol­ǵandyqtan, muny elimizdegi óner báıgeleri arasyndaǵy jurt qyzyǵa tamashalaıtyn eń tany­maly dep aıta alamyn, – dep ol bıyl da baıqaýǵa qatysý­shy­lar­dyń saıysynan tys qalmaı­ty­nyn aıtqan. – Qazaq jeri ejelden ónerge baı, ánmen, jyrmen aty shyǵyp kele jatqan ǵajap meken ǵoı. Solaı desek te, «qanat qaqsa qataıa­dy» demekshi, qaı jerde darynǵa qamqorlyq jasalyp, qoldaý kór­setilse, sol arada án qanaty qa­lyq­tary belgili. Jer-jerdegi jas­tardyń bul jaǵynan «Jas qa­nat» sııaqty balǵyn alańy tur­ǵan­da eshnársege alańdaýyna sebep joq. Talant tasada qalyp qoımaıdy. Jylda bir bulaqtyń kózi ashylyp jatsa, osynyń ózi az tabys emes, – degen Maıra Dáý­let­baqtyń sózin estradada ózindik únimen erekshelengen Erlan Kókeev jalǵastyrdy. – Alǵashqy kezderi saıysqa kásibı mýzykalyq deńgeıi ár túr­li oryndaýshylar qatyssa, jyl­dan-jylǵa ánshilerge qoıyla­tyn talap barynsha óse túsýde. Sonyń nátı­jesinde, búginde bul baıqaýǵa «júzden – júırik, myń­nan – tulpar» shyqqan úz­dikter ǵana óte alatynyna kýá bolyp júr­miz. Bizdiń de munda bir kezdergi izimiz saırap jatyr. Osynda baq synap, baptalǵan adam retinde keıingilerdiń bir nárseni kókeı­lerine túıip júrgenin qalaımyn. О́ner kisini bir sáttik ǵajap kúıge bóleıtin ótkinshi sezim emes, ómir boıy ózińmen birge ómir súretin, qulasań birge qu­lap, shydasań da birge shydap, shyńdalyp baryp shyńyraýdaǵy marjandy syrtqa alyp shyǵatyn qudiret. Sondyq­tan men búgin báıgege qosylǵan on bes órenge sát sapar tileımin, – dedi ol. «Jas qanat» baıqaýynyń Beıbitshilik jáne kelisim sara­ıyn­daǵy  ashylý rásimi de erekshe boıaýymen kóńil jadyratty. Asqaqtata án shyrqalyp, Astana, Atyraý, Almaty, Aqtaý, Jez­qazǵan, Kókshetaý, Pavlodar, Taraz, Taldyqorǵan men Shymkent óńirlerinen qatysatyn jas án­shiler ret-retimen tanystyryl­dy. О́nerpazdar úsh kún qata­ry­nan baq synasatyn báıgeniń syı-sııapaty da bıyl ózgeshe kórinedi. Táýelsizdik toıy qar­sa­ńyndaǵy qaı shara da qazaq­tyń aıbyny men aıdynyn asyrý­ǵa qurylǵany qýantady. Nurzada KÚMISBEK. ___________________ Sýrette: «Jas qanat» baı­qaýynyń ashylý sáti. Sýretti túsirgen Orynbaı BALMURAT.