Qazaqstan bar qazaqqa qamqorshy bolýǵa tıis

Astanadaǵy Dúnıejúzi qazaq­tarynyń IV quryltaıy oıdaǵy­daı uıymdastyryldy. Oǵan Túr­ki­men­standaǵy qazaq dıas­po­ra­sy­nyń jetekshisi Bısenǵul Begdesinov te delegat retinde qatysýǵa tıis edi. Alaıda ol turyp jatqan elinen shyǵa almady. Anyǵyn aıtsaq, shyǵarmady. Begdesinov degen kim? Qazaq­standyq aqparat quraldaryndaǵy derek kózderine súıensek, Begdesinov – Túrkimenstandaǵy az qa­zaqtyń joǵyn joqtap, muńyn muńdap júrgen kózi ashyq, kóki­regi oıaý azamat. Onyń qysymǵa ushyrap, osyndaı jaǵdaıǵa dýshar bolýyna Túrkimenstanda tu­ryp jatqan qazaqtardyń múd­de­sin qorǵaýdaǵy belsendi azamat­tyq ustanymy sebep bolyp otyr­ǵan sııaqty. Kezinde Túrki­men­stan­da qazaq mádenı ortalyǵyn ashý jóninde bastama kóterip, óki­nishke qaraı, tirkeýge kelgende, jergilikti bıliktiń ruqsatyn ala almaǵan ol kóshi-qon máse­le­sin­de tyǵyryqqa tirelgen qan­das­taryna qolushyn berip, jat jurtta júrip jıǵan-tergenderin shashpaı-tókpeı elge ora­lý­lary­na kómektespek bolǵan. О́ıtkeni, qazaqtar Túrkimenstannan tarıhı Otanyna oralý úshin úı-jaı­yn memleketke tastap ketýge tıis. Osynyń ózi-aq atajurtqa  qo­nys aýdarýdy ańsaǵan qazaq­tar­dyń aıaǵyna tusaý bolyp otyr. Beg­desinov Reseıde turatyn ta­nystary arqyly yqtııar hattar jasap, kóshýge bel baılaǵan qazaqtardyń úılerin jekeshelendirýge kómektesken. Onyń bar kinási osy.  Soǵan qaramastan, Túr­kimenstannyń zań oryndary 2011 jyldyń 11 sáýirinde Ash­ǵa­badta Bısenǵul Ońaıulyn alaıaq­tyq jasady jáne para aldy degen aıyppen tutqyndaǵan. Aqyry is sotqa jetip, Bısenǵul Beg­desinov ózine taǵylǵan aıyp­tardyń biri boıynsha shartty túr­de bas bostandyǵynan aıy­ryl­dy. Túrkimenstannyń Ult­tyq qaýipsizdik mınıstrligi  ony qamaýdan bosatqanmen, jeke ba­syn kýálandyratyn qujattary­nan aıyryp, elden shyǵýyna tyıym salyp otyr. О́ıtkeni, sottyń sheshimine sáıkes ol memleketke ózi jekeshelendirýge kómektesken, sóı­tip, Túrki­menstan qazaq­tary­nyń menshigine aýysqan  úı­ler­diń qunyn óteýge tıis. Osy má­se­le sheshilgenge deıin ol eshqaıda shyǵa almaıdy.   Menińshe, elimizdiń Syrtqy ister mınıstrligi osy jaǵdaıǵa aralasyp, shette qysym kórip, qý­dalanyp júrgen Bısenǵul Ońaıulyna arasha túsýi, sóıtip onyń jáne otbasynyń tezirek elge oralýyna kómektesýi kerek sekildi. Álemniń túkpir-túkpi­ri­ne tarydaı shashylǵan qazaqtyń bir ǵana Otany bar. Ol – Qazaqstan. Sondyqtan Qazaqstan bar qazaqqa qamqorshy bolýǵa, bastaryna is túskende olardy qorǵaýǵa tıis dep bilemin. Jarasbaı SÚLEIMENOV, Májilis depýtaty.