О́zimizdiń ulttyq baılanys jáne habar taratatyn spýtnıgimizdiń bolýy tirkelgen spýtnıktik baılanys arnalarynda elimizdiń qajettilikterin qanaǵattandyrýǵa, elimizdiń aqparattyq qaýipsizdigin qamtamasyz etýge, shet elderge ketetin aqshalaı qarajat aǵymyn azaıtýǵa múmkindik beredi.
«KazSat-3» ulttyq spýtnıginiń resýrstaryn qoldanysqa bergen úsh jyl ishinde ony 9 memlekettik organ men kommersııalyq uıym paıdalanýda. О́tken jyly sheteldik baılanys jáne habar taratatyn ǵarysh apparatyn Qazaqstan Respýblıkasynyń ulttyq teleoperatorlaryna kóshirý tolyǵymen aıaqtalǵan bolatyn.
Búginde «KazSat-3» spýtnıginiń negizinde Qazaqstannyń barlyq aýmaqtary boıynsha SD, HD, UHD formatynda sandyq teleradıohabar qamtamasyz etildi. «Qazteleradıo» AQ teleradıohabar salasyndaǵy ulttyq operator qazirgi ýaqytta «OTAU TV» spýtnıktik teleradıohabar baǵdarlamalarynyń paketin translıasııalaıdy.
Spýtnık qyzmetiniń HD-formatyndaǵy telearnalar paketin respýblıkamyzdyń barlyq aýmaǵy boıynsha translıasııalanatyn Caspio HD operatory, sondaı-aq, HVEC formatynda habar taratatyn «Alma TV» kompanııasy paıdalanady. Bul format arnalardyń sanyn jáne olardyń sapasyn arttyrýǵa, HD jáne Ultra HD (4K) arnasyn translıasııalaýǵa múmkindik beredi.
«KazSat-3» spýtnıgin jasaý kezinde apparattyń sıpattamasyn jáne senimdiliktiń qajetti deńgeıin qamtamasyz etýge múmkindik beretin zamanaýı tehnıkalyq sheshimder qoldanylǵan bolatyn. Búginde spýtnıktiń qamtý aımaǵy Qazaqstannyń, Qyrǵyzstannyń, О́zbekstannyń, Tájikstannyń, Túrikmenstannyń, sonymen qatar, Reseıdiń ortalyq bóliginiń aýmaqtaryna taralǵan.
Ǵarysh apparatyn basqarýdy Aqmola oblysynyń Aqkól qalasyndaǵy Ǵarysh apparattaryn jer ústi basqarý kesheniniń jáne Almatydaǵy «Kókterek» Ǵarysh apparattaryn basqarý rezervtik kesheniniń jańa tehnıkalyq quraldaryn paıdalana otyryp, Qazaqstan Respýblıkasy Qorǵanys jáne aeroǵarysh ónerkásibi mınıstrliginiń Aeroǵarysh komıteti «Respýblıkalyq ǵaryshtyq baılanys ortalyǵy» AQ-tyń («RǴBO» AQ) joǵary bilikti mamandary júzege asyrady.
«RǴBO» AQ ujymy elimizdiń táýelsiz telekommýnıkasııalyq naryǵyn odan ári damytý úshin «KazSat» baılanys jáne habar taratý spýtnıkteriniń qazaqstandyq ulttyq toptamalaryn damytý boıynsha jumysty belsendi jalǵastyryp keledi.
