«Aqtaý-Sıtı»: qurylys qarqyn ala bastady

Elbasy Nursultan Nazar­baev­tyń qoldaýymen ómirge kelip, óńirdiń qarqyndy damı tú­sýine ıgi yqpal ete bastaǵan «Jer-Teńiz-Aspan» yqpaldas­ty­rylǵan ınvestısııalyq mega-jobanyń quramdas bir bóligi «Aqtaý-sıtı» qala qurylysy. Ertegideı ásem de, aq shańqan arman qalanyń jobasyn naqty iske asyrý ótken jyly bastaý aldy. Bul kúnderi «Aqqý» dep atalatyn birinshi shaǵyn aýdan­nyń alǵashqy 6 turǵyn úıiniń qurylysy qarqyndy júrip ja­tyr. Keshe oblys ákimi Qyrym­bek Kósherbaev, Aqtaý qalasy­nyń ákimi Ospan Qazaqbaev, merdiger kompanııa basshysy «Kaspıı» áleýmettik kásipkerlik kor­porasııasynyń basshysy A.Nur­ǵalıev basqa da basshy- qosshy­lar qurylys basynda bolyp kóshpeli májilis ótkizdi. Oblys basshysynyń aıtýynsha osynaý arman qa­lanyń qu­ryly­syn bastaý al­ǵashqyda Birikken Arab Ámir­liginiń qa­ty­sýymen bolypty. Álemdik qarjy daǵ­darysyna oraı ol josparǵa ózgeris engen. Iаǵnı, Arab Ámir­ligi bul jobaǵa qalanyń ekinshi, úshinshi shaǵyn aýdandaryn salý­ǵa atsalyspaqshy. Al qazirgi qurylystyń merdigeri «Kaspıı»  áleýmettik kásipkerlik korpora­sııa­sy. Bir aıta keterligi sa­ly­natyn úılerdiń negizi – ekonom klass. Páterdiń bir sharshy metri 1000 AQSh dollary kóle­minde. Bul páter alýshylarǵa tıimdi bolmaqshy. Qala quryly­syn qarjylandyrýǵa Islam damý banki, «Samuryq-Qazyna» jyljymaıtyn múlik qory» AQ-y úles qospaqshy. Turǵyn­dar­dyń óskeleń talabyna saı salynatyn páterler jaıly da, sándi bolatyndyǵy qyzyǵýshy­lyq týǵyzyp ta otyr. Bul rette qurylysshylar alǵashqy 46 myń sharshy metrlik turǵyn úıdi kelesi jyly osy mezgilde paıda­lanýǵa bermekshi. Sonymen qa­tar jaqyn kúnderi osy jerde Qazaqstannyń tuńǵysh Prezı­den­ti­niń zııatkerlik mektebi já­ne orta bilim beretin eki mektep, sport kesheni, árqaısysy 280 oryndyq úsh balalar baqshasy jáne basqa da áleýmettik ny­sandar qurylysy bastalmaqshy. Sóıtip kelesi aıda «Aqtaý Sıtı» qalasynyń quramyna kiretin nysandardy salý júıeli túrde qolǵa alynyp, qalanyń birinshi shaǵyn aýdany naǵyz alyp qurylystar alańyna aı­nal­ǵaly otyr. Arman qaladaǵy páterlerdiń taǵy bir tıimdi jaǵy týraly «Kaspıı» ÁKK basshysy Asqar Nurǵalıevtiń málimdeýinshe ózi arzan, ózi ásem úılerge qonysta­ný­shylar úshin árbir páterde qajettiń bári jasalyp daıyn kúıinde beriledi. Al páterlerdi satyp alý «Turǵyn úı qurylys banki» arqyly júrgiziledi. Sóı­tip, árkim ártúrli saqqa júgirtip júrgen arman qala «Aqtaý-Sıtı» qurylysynyń alǵashqy shaǵyn aýdany «Aqqý» qanatyn keńge sermedi. Qala qurylysy qarqyn ala bastady. Biz osynaý jaýapty da, serpindi jobany qolǵa alǵan «MAG Kaspıı» jaýapkershiligi shekteýli seriktes­tiginiń qurylysshylaryna sát sapar, jemisti jumys tileımiz! Jolaman BOShALAQ. Aqtaý .