Qazaqstan Respýblıkasy Ulttyq qaýipsizdik komıtetiniń quramy jas mamandarmen tolyqty. Almatyda UQK akademııasynyń on úshinshi bitirýshi túlekteri dıplom alyp, áskerı leıtenant shenine ıe boldy.
Bıyl akademııany 81 túlek támamdap, olardyń 14-i oqý ornyn úzdik dıplommen bitirdi. Osy saltanatty jıynǵa UQK tóraǵasy Nurtaı Ábiqaev, ulttyq qaýipsizdik organdary men Uly Otan soǵysy ardagerleri qatysyp, úlken ómirdiń arnasyna túsken jas mamandarǵa aq jol tiledi.
– UQK akademııasyn tabysty aıaqtaýlaryńyzben shyn júrekten quttyqtaımyn. Táýelsizdigimizdiń 20 jyldyǵyna ofıser atanyp memleket qaýipsizdigin qamtamasyz etý qyzmetine joldama alý túlekterimizge aıryqsha mańyz berýde. Memleket basshysy arnaıy qyzmet jáne quqyq qorǵaý organdary qyzmetin jetildirýde, memlekettik shekarany kúzetýde, elimizdiń qorǵanys qabiletin arttyrý máselesine únemi erekshe nazar aýdaryp keledi. Sondyqtan da Elbasy sizderdiń osynda alǵan bilimderińizdi Otan qorǵaý jolynda laıyqty júzege asyrýlary úshin barlyq jaǵdaıdy jasap keledi. Osyǵan oraı búgin UQK organdary jańa zaman talabyna saı bilikti de bilimdi jas kadrlarmen tolyqty dep senemin, – dedi UQK tóraǵasy N.Ábiqaev.
Oqý ozattaryna dıplom men arnaıy tósbelgini tóraǵanyń ózi tapsyrdy. Ulttyq qaýipsizdik mamandaryna jaqsy ári jaýapty qyzmet etý azdyq etetinin, árbir oqıǵany saraptap, synı kózben baǵalap, shuǵyl sheshim qabyldap, syrtqy jáne ishki qaýipterdiń aldyn-alý qajettigin basa eskertken N.Ábiqaev, bul úshin komıtet qyzmetkerlerine jetkilikti ókilettiliktiń berilgendigin tilge tıek etti.
Sondaı-aq, respýblıka Ulttyq qaýipsizdik komıtetine qarasty Shekara akademııasyn da 300 túlek bitirip shyqqandyǵyn habarlaǵymyz keledi. UQK-ge qarasty eń baıyrǵy ári bilim bazasy baı osy oqý orny talaı bilikti maman, alǵyr ulandy memleket qyzmetine qosyp keledi. Jas ofıserlerge akademııa dıplomdaryn tabys etip turyp UQK tóraǵasy N.Ábiqaev:
– Bıyl táýelsizdigimizge 20 jyl! Ulttyq qaýipsizdik komıtetiniń Shekara qyzmeti osy 20 jylda memlekettik shekaramyzdy qyraǵylyqpen qorǵap, el tynyshtyǵyn joǵary deńgeıde qamtamasyz ete bildi. Bolashaqta da qazaqstandyq patrıotızmmen rýhtanǵan, tereń bilimdi, kásibı ofıserlerimiz jaýapty qyzmetti laıyqty jalǵastyrady degen senimdemin. Búgin elimizdiń baıyrǵy áskerı oqý oryndarynyń biri – Ulttyq qaýipsizdik komıtetiniń Shekara akademııasy kezekti túlekterin uıadan ushyrǵaly otyr. Sizderdi osy saltanatty kúnmen shyn júregimnen quttyqtaımyn! – dep jas mamandardyń bolashaqqa degen qadamyna jiger qosyp, memlekettik mańyzdy mindetti abyroımen atqarýǵa senim artty.
UQK basshysy jas túlekterge «Otan saqshysy» degen abyroıly atty árqashan joǵary ustaýdy, memleket shebiniń myzǵymastyǵy men el tynyshtyǵyn qamtamasyz etý jolyndaǵy qasıetti mindetke adal bolyp, sapaly atqarýdy tapsyra otyryp, jas mamandardy Táýelsizdigimizdiń tuǵyryn nyǵaıta túsýge shaqyrdy. Shara akademııa túlekteriniń saltanatty sherýi men ata-analardyń atalmysh oqý ornyna qabyldanǵan jas túlekterdi quttyqtaýyna jalǵasty.
Qanat ESKENDIR, Almaty.
