Ońtústik Koreıada tolassyz jaýǵan jańbyr saldary adam qazasyna alyp kelýde. El astanasy Seýl men onyń soltústiginde oryn alǵan laı kóshkininen 17 adam opat bolyp, taǵy úsh adam iz-túzsiz joǵalyp ketken.
Seýldiń soltústik-shyǵysyndaǵy 110 shaqyrym jerde qaza tapqan 12 adamnyń segizi stýdentter ekeni anyqtaldy. Al bes adam el astanasynda jan tapsyrǵan. Tolassyz jaýǵan jaýyn áli toqtar emes.
Daǵdarys qaýpi áskerge de jetti
Pentagon basshylary Obama ákimshiligi tarapynyń áskerı shyǵyndardy 800 mıllıard dollarǵa deıin qysqartýdy josparlaǵan qadamyna qarsy ekendikterin bildirýde. Áskerılerdiń aıtýynsha, bul áýe kúshteri men teńiz flotynda birqatar qysqartýlar júrgizýge alyp keledi.
Jaıaý áskerler shtabynyń basshysy Martın Dempsı áskerı bıýdjetti qysqartý óte kúrdeli ǵana emes, sonymen qatar qaýipti degendi aıtypty. AQSh qarýly kúshteriniń generaldary senattaǵy tyńdaýlarǵa qatysyp, qorǵanysqa qajetti qarjyny syǵymdaýǵa ózderiniń qarsylyqtaryn bildirgen. Eger qarjy kózi shekteletin bolsa, onda áskerı kúshterdi jaýyngerlik daıyndyqta ustaý úshin áskerılerdiń sanyn qysqartýǵa týra kelmek.
Kıprdiń reıtıngi tómendedi
Moodys halyqaralyq reıtıngtik agenttigi Kıprdiń reıtıngin «A2»-den «Vaa1» deńgeıine deıin tómendetti. Mundaı «qanaǵattanǵysyz» reıtıngi ary qaraı da tómendeýi múmkin degendi bildiredi. Atalǵan agenttik óziniń mundaı sheshim shyǵarýyn araldyń álsiz ekonomıkasymen baılanystyrýda.
Sondaı-aq Moodys sarapshylary kıprlik ishki jalpy ónim ósimi 2011 jyly nól, al 2012 jyly bir paıyzǵa bararyn boljapty. Grekııadaǵy jaǵdaı yqpal etip otyrǵan araldyq memlekettiń qarjylyq júıesi turaqty bolmaıdy dep sanaıdy sarapshylar. Onyń ústine áskerı bazadaǵy jarylystan eldiń 60 paıyzdyq jaryǵyn berip turǵan elektr stansııasy isten shyqqan bolatyn.
Qandaǵar basshysy qaza tapty
Aýǵanstannyń ekinshi iri qalasy sanalatyn Qandaǵarda ákimshilik basshysy Gýlıam Geıdar Hamıdı qastandyq saldarynan qaza tapty. Aldyn ala taratylǵan málimetke qaraǵanda, jarylǵysh zat jankeshtiniń basyna oralǵan shalmasynda jasyrýly bolǵan.
Terakt ákimdik ǵımaratynda Hamıdıdiń jergilikti turǵyndarmen jer daýy boıynsha kezdesýi kezinde jasalypty. Qala basshysy munyń aldynda zańsyz salynǵan qurylystardy syryp tastaýǵa buıryq bergen kórinedi. Sonyń saldarynan eki bala qaıtys bolypty. Negizinen ákim mingen kortej 2009 jyly da shabýylǵa ushyrap, ol ózi sol kezde tiri qalǵan eken.
Qala qoǵamdyq tártipsizdikten qorqady
Lvov qalasynyń aımaqtyq ákimshilik soty osy shahardy nemis basqynshylarynan azat etken kúndi, ıaǵnı 27 shildeni jappaı atap ótýge tyıym saldy. Mundaı aýqymdy sharalardy ótkizý týraly aryzdy «Sokol» uıymy, Kompartııa men Ardagerler keńesi tapsyrypty.
Alaıda qalalyq keńes nemis basqynshylarynan azat etý kúnin atap ótýge tyıym salý usynysymen sotqa júgingen. Sottyń mundaı sheshim shyǵarýyna osy qalada 9 mamyr kúni oryn alǵan tártipsizdikter túrtki bolǵan. Onyń ústine jergilikti quqyq qorǵaý basqarmasy da qoǵamdyq qaýipsizdikke tónetin qaýipke baılanysty sharaǵa tyıym salý ótinishimen shyǵypty.
Nemister kesh otaý tigetindi qup kóredi
Nemister sońǵy jyldary kesh úılenedi nemese turmysqa shyǵatyn kórinedi. Germanııanyń Federaldyq statıstıka vedomstvosynyń málimetteri osylaı deıdi. Mysaly, 2009 jyly árbir úılengen erdiń jasy 33 bolsa, al qyzdardyń arasynda bul kórsetkish 30 jasty quraǵan.
Osydan qyryq jyl buryn, ıaǵnı 1970 jyly GFR-da erlerdiń úılený jasy 26 bolsa, qyzdarynyń turmys qurýy 23 jas bolǵan kórinedi. Al GDR-de jastar tipti bir-eki jas erte otaý qurypty. Qazir jaǵdaı kerisinshe qalyptasyp otyr. Batystyq nemister shyǵystaǵy qandastaryna qaraǵanda bir-eki jylǵa buryn otaý tigedi eken.
Qysqa qaıyryp aıtqanda:
*Kolýmbııa soty burynǵy aýyl sharýashylyǵy mınıstri Andres Fılıpe Arıasty tutqyndaýǵa sheshim shyǵarǵan. Ol óz qyzmetinde fermerlik sharýashylyqtarǵa berilýi tıis sýbsıdııany iri jer ıelenýshilerge úlestirgen degen kúdikpen aıyptalyp otyr.
*Halyqaralyq valıýta qorynyń jańadan saılanǵan tóraıymy Krıstın Lagard problemaly elderge sýbsıdııa bólip kele jatqan uıymǵa qosymsha qarjylyq resýrstar kerek ekendigin málimdedi. 2007 jyly HVQ sońǵy jyldary onsyz da qarjylyq júıesi turaqsyz sanalatyn elderge qarjy quıýdy eki esege arttyrǵan-dy.
*Qyrǵyzstan turǵyndaryna Manas pen belgili jazýshy Shyńǵys Aıtmatovqa eskertkish turǵyzý úshin óz qarjylaryn qosý usynylyp otyr. Mundaı usynyspen Qyrǵyz táýelsizdiginiń 20 jyldyǵyn atap ótý jónindegi memlekettik dıreksııasy shyqqany belgili boldy.
*Meksıkanyń 33 jaýyngeri kólikpen AQSh-tyń Tehas shtatyn jalǵastyratyn kópirmen shekaradan ótip ketken. Aldarynan kútip alǵan shekarashylar jaǵdaımen tanysyp, olardyń baǵyttan qateleskeninen habardar bolǵan soń keri qaıtarǵan.
Internet materıaldary negizinde ázirlendi.
