Bolashaqqa jasalǵan ınvestısııa

«Eldiń atyn er shyǵarar» degen halyq danalyǵyna kún saıyn kóz jetkizip júrmiz. Sporttyq saıys­tar­da kók baıraq kókte jelbirep, Án­uran aýany tilip ótkende kóki­rek­ti maqtanysh sezimi kerneıdi. Jat jerde abyroıyń asqaq­tap, me­reıiń ústem bolyp jatsa, nege shat­tanbasqa?! Dúnıeniń myna shetinde otyryp «Meniń Qazaqstanymdy» birge shyrqaısyń. Baby bolmasa, baǵlannyń baǵy janbaıtyny belgili. Maıtalmandy maı berip baptaıtyn bapkerdiń jóni bólek. Al onyń júrip-turýy, as-sýy, jattyǵatyn ornyn daıarlap berý de úlken jumys. Mundaı kezderde ob­lystyq sport jáne týrızm basqar­ma­laryna batpandaı júktiń artylary belgili. Degenmen, «jalǵyzdyń úni shyqpas» degendeı tek bir ǵana bas­qarma júzdegen sportshy men olar­dyń bapkerlerin beıqam ómirmen qam­tamasyz etýi qıyn. Osyndaı da qoly ashyq, jany jomart, el bola­shaǵyna alańdaıtyn aqshaly azamat­tar­dyń atqarar róli bólek. Olar ádette «mynany men jasadym» dep kókirek kermeıdi. Úndemeı júrip, úlken ister tyndyrady. Mysaly, Beıjińdegi jalǵyz altynnyń ıesi Baqyt Sársekbaevty Qazaqstanǵa aldyrtyp, jaǵdaıyn jasap, alańsyz jattyǵýyn qamtamasyz etken kim dep oılaısyz? Ol – Azat Perýashev. Shet jerde qyspaq kórip, tirsekten qaǵyl­ǵan jigitti týǵan jerine aldyrtyp, baptap báıgege qosty. Baqyt Olım­pıadany baǵyndyrdy. Degenmen, Azat Perýashev eshqandaı minberde Baqytqa jasaǵanyn badyraıtyp aıt­qan emes. Al qazaq sportyna jan­ashyr ondaı azamattar kóptep sanalady. Qyzylorda oblysynda «Saýts oıl» degen kompanııa bar. Aty aı­typ turǵandaı munaı óndirýmen aınalysady. Osy kompanııa Qy­zyl­orda qalasynan tennıs ortalyǵyn salyp berýge kómektesti. Búginde eń aqshaly oıyn sanalatyn tennıstiń bizdiń aımaqta kenjelep qalyp jatqany shyndyq. Osy kom­panııanyń arqasynda qyzyl­orda­lyq jas balalar tennıs kortyna baryp, raketkasyn ustap, sheberligin shyńdap jatyr. Mundaı qamqor­lyqtan soń aqmeshittik Sharapova­lardyń shyqpaýy múmkin emes. Al «Best-servıs» degen mekeme Jalaǵash aýdanyndaǵy №2 balalar men jasóspirimder sport mektebine kúrdeli jóndeý ótkizýge qolushyn sozdy. Atalǵan mektepte qanshama bala tálim alyp jatyr. Bolashaqta olja salatyn balǵyndardyń jaǵdaı­yn jasaý da ózindik saýapty is bolsa kerek. Sonymen qatar, «Jezkıik K» JShS Shıeli aýdanynyń Aqtoǵan aýylynda fýtbol alańyn saldy. Onymen birge, voleıbol, jeńil atletıka alańdaryn da jasap berdi. Jasyl alańda dop teýip ósken balanyń fýtboldan alar orny da bólek bolýǵa tıis. Baıqasańyz, mesenattar tek oblys ortalyqtarynda ǵana emes, qıyr jaılap, shet qonǵan aýyldarǵa qaraılasyp jatyr. «El ishi – óner kenishi» deıtin bolsaq, mundaı ıgilikti ister bulaqtyń kózin ashýǵa baǵyttalǵany aıdan anyq baıqalady. Erjan BAITILES. Qyzylorda.