Elimizdiń eń iri megapolısi Almaty qalasy ákimdiginiń janyndaǵy Memlekettik til saıasatyn odan ári jetildirý jónindegi jumys toby sońǵy jyldary turaqty qyzmet etip keledi. Jumys toby otyrystarynda bir ǵana taqyryp aıasynda, atap aıtqanda, “Memlekettik tildiń qoldanylý aıasyn keńeıtý jáne damytý baǵytynda atqarylǵan jumystar týraly” habarlamalar tyńdalyp, pikir talqysy barysynda jetistikter men kemshin tustar atalyp ótip, aldaǵy ýaqytta atqarylatyn tıimdi is-sharalar aıqyndalyp, usynystar jasalady.
Jumys tobynyń kezekti otyrysynda bir mekemede memlekettik tilde, ıaǵnı qazaq tilinde is júrgize almaıtyn ulty qazaq memlekettik qyzmetkerlerdiń sany paıyzǵa shaqqanda kóp ekeni qyzý pikirtalas órbitti. Elbasy sózimen aıtqanda, Qazaqstan halqynyń biriktirýshi quralyn, ıaǵnı memlekettik tildi syılamaıtyn, memlekettik tilde jumys isteı almaıtyn adamnyń memlekettik qyzmet atqarýyna “quqy bar ma?” degen suraq týǵany sol eken, májiliske qatysyp otyrǵan aýdan ákimi “Quqysy bar. “Quqysy joq” degen zań joq” dep, tez jaýap qaıyrdy. Bul jaýapqa jumys toby músheleriniń biri “jaraıdy, zańdyq turǵydan durys bolsyn, alaıda, birinshi basshy memlekettik tildi bilmeıtin qarakózderdi jeke shaqyryp alyp, “ata-tegińniń tilin nege úırenbeısiń” dep, úlkendik jasamaı ma?” dep, qynjylys bildirdi. Aıtaıyn degenim, elimizdiń qaı zańynan bolsyn joǵary turatyn Negizgi zańda, Konstıtýsııada memlekettik til jáne resmı til týraly arnaıy bap jazylǵany belgili. Sondaı-aq memlekettik tildiń qoldanylý aıasyn keńeıtý jáne damytý jónindegi negizgi Zańnyń ár taraýynda taratylyp naqtyly kórsetilgen. Sonda Ata Zańnyń arnaıy babynyń memlekettik qyzmetkerler úshin zańdyq kúshi bolmaǵany ma? Konstıtýsııalyq Zańnyń memlekettik til týraly babynyń Zań ekenin dáleldeıtin taǵy zań kerek pe? Durysynda, elimizdiń Negizgi Zańynyń, Konstıtýsııanyń ár baby elimizdiń barlyq azamattaryna ortaq mindet júkteıdi emes pe?! Memlekettik qyzmet atqara júrip memlekettik tildiń órisin keńeıtýge salǵyrt, keıde tipti nemquraıdy qaraıtyn qyzmetkerler muny túsinbeı me, álde túsingisi kelmeı me? Saırash ÁBIShQYZY.
